80% glo regering is korrup – opname

2012-10-22 10:23

Johannesburg – Sowat 80% van mense wat in Suid-Afrika se groot metropolitaanse gebiede woon, glo politici op seniorvlak in die regering is korrup, toon 'n opname wat Maandag vrygestel is.

"'n Opname van 2 000 inwoners van Suid-Afrika het bekendgemaak dat die mense in Suid-Afrika se agt groot metrogebiede voel dat 78% van politici op seniorvlak korrupt is," het Neil Higgs, direkteur van die marknavorsingsmaatskappy TNS Research Surveys, in 'n verklaring gesê.

Tien persent van respondente stem nie saam nie, en 12% het gesê hulle weet nie.

Higgs het gesê die meeste van die mense wat aan die opname deelgeneem het, glo dat korrupsie in die privaatsektor ook hoogty vier.

"[Altesaam] 70% dink korrupsie is netso erg in die privaatsektor."

Altesaam 18% het nie saamgestem nie.

In 'n soortgelyke opname, waaraan 2 000 mense, wat in metrogebiede woon, deelgeneem het, het TNS bevind dat 48% dink adv. Thuli Madonsela, Openbare Beskermer, haar goed van haar taak kwyt.

42% het gevoel die regering ignoreer dikwels haar bevindings.

"Dit is egter kommerwekkend dat slegs die helfte van die mense voel dat die regering werklik iets omtrent die probleem [korrupsie] doen," het Higgs gesê.

"Dalk hou dit verband met die opvatting dat die regering dikwels die bevindings van die Openbare Beskermer ignoreer, wat 'n onverdedigbare situasie is."

– Volg Nuus24 op Twitter