8 vas oor bedrog van R6 m. by padfonds
2012-01-20 08:07
Pretoria – Ses prokureurs, ’n dokter en ’n agent het die Padongelukkefonds (POF) glo uit R6 miljoen geswendel.
Die arrestasies van dié agt mans is gedoen nadat die hooggeregshof in Pretoria in 2011 sewe advokate uit hul praktyke geskors en nóg ses van die register van advokate geskrap het nadat hulle onregmatig geld uit die fonds gemaak het.
Die 13 regslui skuld die fonds R15 661 00. Hulle het reëls van die Pretoriase balie oortree.
Die POF is bankrot.
Lt.kol. Katlego Mogale, Gautengse polisiewoordvoerder, het Donderdag gesê die arrestasie van die ses prokureurs, die dokter en die agent weens bedrog hou nie verband met die saak waar die 13 regsmanne onderskeidelik geskors en van die rol geskrap is nie.
Volgens Mogale het die ses prokureurs, die dokter en die agent glo namens kliënte eise teen die fonds ingedien.
Die derdeparty-eise, wat ná ’n botsing ingedien is, is na dieselfde dokter verwys wat in sommige gevalle mediese sertifikate uitgereik het aan eisers wat hy nie fisiek ondersoek het nie.
In van die gevalle was die eisers nie eens in botsings betrokke nie.
Mogale het gesê polisielede van die handelsmisdaadeenheid in Gauteng het die dokter, ene dr. Mo-shweu (40), die agent, ene mnr. Mosche (58), en ’n prokureur, ene mnr. Molefe (37), Dinsdag gearresteer.
Mogale kon nie teen druktyd die mans se voorname bevestig nie.
Moshweu en Molefe is in die Pretoriase landdroshof op borgtog van R10 000 elk vrygelaat, terwyl Mosche op borgtog van R1 00 vrygelaat is.
Mnre. Mabena (36) en Mathumo (39), albei prokureurs (wie se voorname ook nie bekend is nie), is Woensdag gearresteer en het in dieselfde hof borgtog van R10 000 gekry.
Nog drie prokureurs, mnre. Selahle (30), Phooko (37) en Ramafalo (49), het Donderdag in die hof verskyn nadat hulle hulself aan die polisie oorgegee het.
Volgens Mogale is dié drie ook op borgtog van R10 000 elk vrygelaat.
Die sake is vir verdere ondersoek uitgestel.
– Volg Nuus24 op Twitter
- Beeld