7 jaar tronkstraf vir SA lugwaardin met dwelms
2010-09-28 06:57
Johannesburg - ’n Lugwaardin van die Suid-Afrikaanse Lugdiens (SAL) is in Londen vir sewe jaar tronk toe gestuur.
Elphia (Tshidi) Dlamini (42) van Kaapstad is in Junie met 3 kg kokaïen op die Heathrow-lughawe betrap.
Luidens ’n verklaring deur die Britse grensbeheeragentskap is Dlamini in die Isleworth-hof in Londen skuldig bevind aan smokkelary met dwelms en gevonnis.
As die kajuitkoördineerder van ’n vlug tussen Johannesburg en Heathrow en was sy die mees senior kajuitbeampte aan boord toe die vlugbemanning op 26 Junie op die lughawe voorgekeer is.
Luidens die verklaring is die hele bemanning deur ’n snuffelhond genaamd Clever Trevor deurgesnuffel.
Toe Clever Trevor by Dlamini kom, het hy baie opgewonde vir sy hanteerder aangedui dat hy die reuk van kokaïen aan Dlamini bespeur.
Sy het dadelik skuld beken en die beamptes ook die versekering gegee dat nie een van die res van die bemanning van die dwelms geweet het nie.
Drie pakkies dwelms ter waarde van sowat R1,5 miljoen is in Dlamini se onderklere gevind.
“Sy het duidelik gedink dat die agentskap minder aandag aan lugdienspersoneellede sou gee, maar sy het haar misgis,” het mnr. Peter Avery, assistent-
direkteur gemoeid met misdaadondersoeke in die agentskap, gesê.
Dit was die derde geval waar op dwelms afgekom is wat op ’n SAL-vlug deur Heathrow gesmokkel is.
- Beeld