68 busbestuurders beland in rivier
2010-01-22 07:09
Cobus Coetzee
Johannesburg - Die Johannesburgse nooddienste het Donderdag 68 busbestuurders van die Putco-busdiens uit ’n oorstroomde rivier gered nadat hul bus daarin vasgeval het.
Die bestuurders was net ná 15:00 van Soweto in Canadaweg na die busdepot in Putcoton wes van die stad op pad toe die bus deur ’n oorstroomde rivier naby Riverlea wou ry en die bus se enjin gaan staan het.
“Nooddienswerker was reeds op die toneel om ’n wit BMW uit die water te trek. Ons was net klaar met die motor toe die bus wou deurry,” het JJ Viljoen, gebiedshoof van die Johannesburgse nooddienste, gister gesê.
“Ons het vir die busbestuurder gewaai en geskree om nie deur te ry nie, maar hy het ons geïgnoreer.”
Die bus het byna halfpad deur die oorstroomde rivier, sowat 20m breed en op plekke ’n meter diep, gery voordat dit onder ’n treinbrug vasgeval het.
Die nooddienste se watervleuel is na die toneel ontplooi en twee rubberbootjies, wat Crocs genoem word, is gebruik om die passasiers met toue na veiligheid te trek.
Tien nooddienswerkers het byna twee uur gewerk om al die buspassasiers op droë grond te kry.
“Die water was omtrent halflyfhoogte waar die bus vasgeval het. Op die bodem het ’n laag gladde slik gelê. Die stroom het sterk agter die bus verbygevloei,” het Viljoen gesê.
Volgens hom word dié deel van Canadaweg gereeld in die reënseisoen oorstroom.
“’n Paar jaar gelede is twee mense weens oorstromings hier dood.”
Philimon Bogopa, assistent- sake-eenheidbestuurder van Putco wat op die toneel was om toe te sien dat al die busbestuurders veilig by die werk kom, het gesê geen werknemer is in die voorval beseer nie.
Putco sal ondersoek instel om te bepaal of van hul werknemers nalatig was.
Viljoen het motoriste gewaarsku om nie kanse ge waag as paaie oorstroom is nie. “’n Mens kan nie sien hoe diep dit is of hoe sterk die water vloei nie,” het hy gesê.
Insp. Edna Mamonyane, metropolisiewoordvoerder, het Donderdagaand gesê die pad sal gesluit bly totdat die reën ophou en dit weer moontlik is om daar te ry.
- Beeld