60% van SA paaie het skade, slaggate
2010-12-14 22:44
Beeld
Johannesburg - Sowat 60 km van elke 100 km van die land se padnetwerk van meer as 550 000km is beskadig of het slaggate, het die Automobiel-Assosiasie Dinsdag gesê.
Sowat een uit elke 12 dodelike padongelukke (8,02%) in Suid-Afrika is aan die swak toestand van die paaie toe te skryf, het Logan Maistry, woordvoerder van die department van vervoer, gesê.
Die grootste oorsaak van padsterftes (82%) is menslike foute en die res is aan onpadwaardige voertuie te wyte.
Die AA het volgens Gary Ronald, woordvoerder, bevind die agterstand met die instandhouding van Suid-Afrika se paaie beloop sowat R110 miljard.
“Dié bedrag sluit nasionale paaie uit.”
Dit is egter ’n verbetering op die 2003-beraming van R200 miljard.
Daar was ’n skerp toename in die aantal eise wat met swak padtoestande verband hou, het Santam in ’n verklaring gesê.
“Die toestand van die paaie het verreikende gevolge ten opsigte van die koste van versekering, bybetalings en ander koste soos insleepdiens en motorhuur,” het Louise Pharo, hoof van kommersiële sake in dié versekeringsmaatskappy, gesê.
“Die ongerief-faktor is beduidend.”
As ’n voertuig weens swak padtoestande beskadig word, moet ’n eis by die betrokke department van vervoer op nasionale, provinsiale of plaaslike vlak ingedien word.
Volgens George Corbett, bedryfsdirekteur van Europcar, het dié motorverhuringsmaatskappy se uitgawes weens ongelukke met sowat 25% toegeneem.
“Daar was veral ’n toename in skade aan windskerms, wat deels toegeskryf kan word aan padwerk wat nie behoorlik opgeruim is nie.”
Maistry het gesê R70 miljard gaan in die volgende drie jaar aan die padnetwerk bestee word.
Die departement van openbare werke het nog R10 miljard vir die opgradering van landelike paaie bewillig.
Volgens Maistry het sy departement die uitdagings vroeër vanjaar op ’n padkonferensie bespreek.
“Daar is nie groot probleme met ons nasionale paaie nie. Die probleem is egter op provinsiale en plaaslike regeringsvlak, waar geld wat vir padwerk bestem is vir ander projekte gebruik word.”
Volgens die Johannesburgse Padagentskap (JRA) het hy sowat R120 miljoen vir die instandhouding van die stad se paaie begroot.
“Die instandhoudingsbegroting is nie net vir slaggate nie en ons moet besluit wat die dringendste aandag nodig het,” het adv. Thulani Makhubela, JRA-woordvoerder, gesê. “Ons maak ook staat op die publiek om ons in kennis te stel van slaggate waarvan hulle bewus is.”
- Volg Nuus24 op Twitter. Kliek hier.