55 000 Christene sal stadion vol pak
2010-03-22 08:04
Nurene Jassiem, Die Burger
Kaapsatd - Elkeen van die 55 000 permanente sitplekke in die nuwe Kaapstad-stadion sal na verwagting Maandag vir die eerste keer gevul wees wanneer net soveel Christene die Jesus vir Kaapstad-saamtrek bywoon.
Dit is die eerste byeenkoms in dié stadion wat nie met sport verband hou nie, en die derde keer dat dié nuwe stadion gebruik word. Die ander toetsgeleenthede was ’n sokkerwedstryd, wat 20 000 toeskouers gelok het, en ’n rugbyfees met 40 000 geesdriftiges.
Een van die grootste aantrekkingskragte ná vandag se saamtrek is die evangelis Angus Buchan, wie se lewensverhaal in die rolprent Faith Like Potatoes uitgebeeld word. Volgens Buchan se woordvoerder en een van vandag se sprekers, die oudpolisieman, Johnny Louw, is sy “geestespa” al sowat ’n week in afsondering om hom vir die saamtrek voor te berei.
“Oom Angus is ’n baie nederige mens en hy wil seker wees dat die boodskap wat hy aan die mense oordra regstreeks van God kom. Daar is 25 mense in sy bidgroep wat help om te bevestig dat die boodskap wat gebring word, vir hier en nou is.”
Buchan se boodskap gaan nie ’n preek wees nie, maar ’n “profetiese boodskap”.
“Ons glo die feit dat die stadion vir dié saamtrek oopgestel is, is ’n bo-natuurlike ingryping,” het Louw gesê.
Heelparty mense, onder wie die voormalige Bafana Bafana-sokkerspeler Ricardo Katza, sal geloofsgetuienisse aflê.
- Die Burger