500 reeds dood op land se paaie
2011-12-20 07:57
Jan Gerber
Kaapstad – Terwyl verkeersbeamptes onder motoriste se skerp tonge deurloop, het padongelukke teen gisteroggend reeds sowat 500 lewens sedert 1 Desember landwyd geëis.
Ashraf Ismail, woordvoerder van die Padverkeerbestuurskorporasie, het ’n beroep op motoriste gedoen om geduldig en met die nodige agting teenoor verkeersbeamptes op te tree.
Volgens hom het die publiek sedert die begin van die vakansieseisoen talle verkeersbeamptes beledig.
“Verkeersbeamptes het ’n baie veeleisende werk. Mense moet asseblief verdraagsaam teenoor hulle wees,” het Ismail gesê.
Kenny Africa, Wes-Kaapse verkeershoof, het gesê mense verontagsaam verkeerswette en vat kanse. Wanneer die verkeersbeamptes hulle egter teregwys, “is die verkeersbeampte altyd die verkeerde een”.
Africa meen mense se gesindheid moet verander.
Ismail het ook gesê mense wat roekeloos verbysteek, is een van die groot oorsake van ongelukke waarin meer as vyf mense sterf.
Volgens Africa is nog net twee ongelukke in die Wes-Kaap sedert Desember só veroorsaak.
Albei voorvalle was Saterdagoggend op die N1 toe leë taxi’s wat op pad terug na die Oos-Kaap was om nuwe passasiers op te laai in botsings reg van voor betrokke was. In die een ongeluk is sewe mense dood en in die ander twee.
“Dit is ’n onding wat ons moet hokslaan,” het Africa gesê en bygevoeg daar sal eersdaags met die taxiverenigings vergader word om die “op- en afjaery te beëindig”.
Hy het gesê in die meeste gevalle was net een motor in ongelukke in die Wes-Kaap betrokke, wat aandui dat moeë bestuurders ’n probleem is.
“Die algemene goue reël van die pad is om ná elke 200km of twee uur stil te hou, uit die voertuig te klim en die bene te rek. As almal net dié reël wil toepas, gaan ons minder ongelukke hê.”
As meer mense hul sitplekgordels dra, sal daar ook minder sterftes wees.
Africa het ook die publiek aangemoedig om roekelose padgebruikers by 021 946 1646 aan te meld.
- Die Burger