41 000 sê nee vir pornografie-kanaal
2010-03-10 14:51
Bloemfontein – Meer as 41 000 mense het reeds nee gestem in ‘n veldtog teen ‘n nuwe pornografie-kanaal op DStv, het die vakbond Solidariteit Woensdag gesê.
“’n Totaal van 41 381 Suid-Afrikaners het reeds nee gesê sedert Solidariteit Helpende Hand se veldtog teen pornografie in Februarie begin het,” het Lindie Strydom, Helpende Hand se woordvoerder, gesê.
Solidariteit beplan om binnekort alle protesboodskappe aan DSTV MultiChoice te oorhandig om te wys dat sommige Suid-Afrikaners gekant is teen die idee.
Strydom het bygevoeg dat Helpende Hand ook ‘n verslag aan die maatskappy sal oorhandig met feite oor pornografie in Suid-Afrika.
Dit sluit studies is wat daarop dui dat 77% van molesteerders van seuns en 67% van mense wat meisies molesteer pornografie gebruik het en dit wat hulle gesien het op die kinders uitoefen.
Navorsing het verder ook getoon dat dit nie waar is dat verkragting en molestering afneem as pornografie vrylik beskikbaar is nie.
MultiChoice het aangedui dat hul eie navorsing oor die kwessie klaar is en dat dit binne die volgende twee weke beskikbaar gemaak sal word.
- Sapa