40 korrupte beamptes afgedank
2011-10-31 13:08
Polokwane – Die Limpopo-regering het 40 beamptes wat van misdaad en korrupsie beskuldig word, afgedank, het Tebatso Mabitsela, 'n woordvoerder, gesê.
"Ons het 40 beamptes afgelê wat van misdaad en korrupsie beskuldig is," het Mabitsela gesê.
"Die beamptes is dissiplinêr verhoor en ons het bevind dat hulle skuldig is aan misdaad en korrupsie."
Mabitsela het reageer op 'n berig in naweekkoerante oor die Limpopo-regering wat ondersoek word vir bedrog en korrupsie ter waarde van miljoene rande.
"Ons is nie bewus van enige ondersoeke nie, maar as 'n provinsiale regering sê ons indien dit waar is, wil ons hê die Valke moet 'n ondersoek sonder guns of vrees doen."
Mabitsela het gesê die provinsiale regering het maatskappye op die swartlys geplaas nadat hulle "kontraktuele verpligtinge verontagsaam het" en omdat hulle "huise aan mense in die provinsie verskaf wat nie op standaard is nie".
Die Sunday Times het die naweek berig dat 'n teenkorrupsie-taakspan die provinsie ondersoek.
Mcintosh Polela, woordvoerder van die Valke, het gesê hulle kyk na die saak.
Volgens die berig in die Sunday Times, behoort een van die maatskappye wat ondersoek word aan 'n neef van Julius Malema, president van die ANC-jeugliga.
– Volg Nuus24 op Twitter
- SAPA