3de party glo rede dat Joost, Amor kan skei
2010-08-07 08:01
Beeld
“’n Derde party” speel blykbaar ’n rol in die mislukking van pogings om Joost van der Westhuizen en Amor Vittone se huwelik te red, is gister aan Beeld bevestig.
Die moontlikheid “is baie sterk” dat die oud-Bok en die sangeres se egskeiding in ’n openbare geveg in die howe gaan eindig, is gesê.
Midde-in die waarskynlike gevegte staan “nie geld nie, maar die egpaar se twee kinders, Jordan (6) en Kylie (4)”.
Albei se regsverteenwoordigers – mnr. Robert Klinkenberg vir Van der Westhuizen en mnr. Claudio Bollo vir Vittone – het gister gesê al die moontlike word met samesprekings agter toe deure gedoen om te keer dat die egskeiding “ontaard in vuil wasgoed wat in die openbare howe uitgehang word,” soos Bollo dit gestel het.
Klinkenberg het gesê: “Ons probeer om die saak te skik sodat niemand in die proses seerkry nie, veral nie die kinders nie.”
Volgens Bollo wentel Vittone se hele lewe om haar twee kinders. “Dit is al wat ek in hierdie stadium kan sê.”
Van der Westhuizen het eergisteraand gesê hy is “ontsettend lief” vir sy kinders en wil net die beste vir hulle hê.
Klinkenberg, wat deur twee advokate bygestaan word, wou nie uitwei oor die kinders nie. “Ek kan wel bevestig die moontlikheid bestaan beslis dat dit ’n bestrede egskeiding gaan wees.”
Vittone het gistermiddag gesê sy wil nie self oor die egskeiding praat nie. “Praat asseblief maar met mnr. Bollo,” het sy ge-SMS.
Volgens Bollo is hy en Van der Westhuizen se regspan sedert verlede week in samesprekings gewikkel oor die eise wat die egpaar met die oog op die egskeiding oor en weer stel.
“Ons het al begin onderhandel nog voordat Joost eergister die egskeidingsdagvaarding aan Amor laat bestel het.
“Ek dink albei partye wil baie graag ’n onsmaaklike en uitgerekte egskeiding in die howe keer. As geen ooreenkoms egter bereik kan word nie, is dit onvermydelik.”
Gerugte het gister die ronde begin doen dat “’n derde party” betrokke is by die besluit om voort te gaan met die egskeiding.
By navraag het ’n goeie kennis van die egpaar wat op voorwaarde van anonimiteit gepraat het, gesê ’n derde party is wel betrokke. Hy wou nie dié persoon se naam bekend maak of sê of dié by Van der Westhuizen of Vittone betrokke is nie.
“Joost dagvaar Amor. Maak jou eie afleidings,” was al wat die persoon wou sê.