3 wat glo stroop, ontsnap
2011-03-25 09:11
Nelspruit - Drie vermeende renosterstropers het verlede naweek uit die polisieselle in Badplaas, Mpumalanga, ontsnap en is steeds soek.
Die drie verdagtes, wat as uiters gevaarlik beskou word, is in Augustus verlede jaar naby Badplaas in hegtenis geneem toe hulle glo op pad was om ’n renoster in die Songimvelo-reservaat van die Mpumalanga-toerisme-en-parke-agentskap (MTPA) naby
Barberton te gaan stroop.
Die polisie het egter berig ontvang oor die beplande slagting.
Hulle het die drie voorgekeer en skietlampe, kapmesse, asook verskeie AK47- en .303-geweerpatrone in hul voertuig gevind. Die verdagtes het later ’n AK47- en .303-geweer wat by ’n begraafplaas naby ’n huis in ’n private wildtuin buite Badplaas versteek was aan die polisie uitgewys.
Die drie verdagtes is blykbaar bekende stropers en word glo selfs met renosterstropery in so ver as KwaZulu-Natal verbind.
Die verdagtes is ook verbind met die ernstige aanranding van een van hul eie beweerde sindikaatlede omdat hulle vermoed het hy is ’n polisie-informant.
Die drie verdagtes het sedert Augustus reeds sewe keer in die hof verskyn. Die verrigtinge is telkens uitgestel. Hulle sou komende Maandag weer in die hof in Carolina verskyn.
Vrydagnag het die verdagtes stawe van die tronkselhek afgesaag en daarna ’n gat deur die traliedak van die oefenhok voor die selle van die polisiekantoor in Badplaas gesaag.
Hulle het daarna oor die polisiekantoor se muur geklim en by die hek uitgeloop.
Toe die polisie die selle omstreeks 22:30 besoek, het hulle die ontsnapping ontdek.
Drie ander verdagtes wat weens onverwante misdade in dieselfde sel aangehou is, het nie ontsnap nie.
Die polisie in Badplaas het gesê die verdagtes is uiters gevaarlik en waarskynlik gewapen.
- Enige inligting kan aan ao. M.J. Zulu, ondersoekbeampte, by 0 017 844 1101 gegee word.
Lucky Maseko
Mdu Sfiso Mathebula
Joseph Sifunda