3 sterf, 15 beseer in taxi-ongeluk
2010-12-22 21:49
Johannesburg – Drie mense is dood en 15 beseer nadat 'n taxibestuurder buite Carletonville beheer oor die voertuig verloor het, het paramedici in Gauteng gesê.
Vanessa Jackson, woordvoerder van ER24, het gesê 'n ambulans wat op 'n ander oproep reageer het, het net na 10:00 op die ongeluk afgekom.
"Vir een of ander rede het die taxi meganiese probleme gehad, wat veroorsaak het dat die bestuurder beheer oor die voertuig verloor en die taxi verskeie kere rol."
Volgens paramedici op die toneel het die taxi 'n paar meter ver gerol voor dit op sy dak tot stilstand gekom het.
"Meeste van die insittendes is uit die voertuig geslinger en twee mans het hul lewens verloor toe dít gebeur."
Vyf ander pasiënte, insluitend twee kinders, het kritieke beserings opgedoen en 'n helikopters is ontbied om die beseerdes te vervoer.
'n Helikopter het na die toneel teruggekeer om 'n kritiek beseerde man na die hospitaal te neem, maar die man het weens sy beserings beswyk.
Die ander kritiek beseerde paasiënte, 'n man en 'n agt maande oue baba, is na 'n hospitaal geneem.
Die ander 11 mense wat in die taxi was, het minder ernstige en ligte beserings opgedoen en is per ambulans na die hospitaal geneem.
Die taxi het 18 mense, insluitend die bestuurder, in die rigting van Potchefstroom, sowat 12km buite Carletonville, vervoer.
Die pad is vir verkeer gesluit, maar is later heropen.
Jackson het gesê die oorsaak van die ongeluk word ondersoek.
Volg Nuus24 op Twitter
- SAPA