3 steek raadslid se huis aan die brand
2009-10-13 14:19
Johannesburg - Drie mense wat vermoedelik ‘n raadslid se huis in Palm Ridge naby Katlehong aan die brand gesteek het is in hegtenis geneem, het die Ekurhuleni munisipaliteit gesê.
“Gelukkig is die skade min en geen beserings is aangemeld nie. Die verdagtes is in hegtenis geneem na inligting deur die polisie opgevolg is,” het woordvoerder Zweli Dlamini gesê.
Die brandstigtery hou glo verband met die betogings teen swak dienslewering in die gebied.
Dlamini sê tot dusver is 68 mense tydens die betogings, wat Sondagaand begin het, in hegtenis geneem.
Polisiewoordvoerder, konst. Lindelani Dladla sê 15 mense is beseer toe polisie betogers met rubberkoeëls in bedwang probeer bring het, nadat hulle polisievoertuie met klippe bestook het.
Dladla sê die betogers is uiteen en die situasie is "stil".
- Sapa