3 soldate van SA in DRK verkla ná dronkmoles
2010-08-24 10:00
Johannesburg - Drie Suid-Afrikaanse soldate, onder andere ’n senior offisier, gaan weens verskeie oortredings van die militêre gedragskode in Kinshasa aangekla word.
Die drie is deel van Suid-Afrika se vredesmagte in die Demokratiese Republiek van die Kongo (DRK).
Die senior offisier, wat van die Hoedspruit-lugmagbasis kom, het ’n gesagsposisie by die Suid-Afrikaners se hoofbasis in Kinshasa.
Die klagte spruit uit ’n voorval onlangs toe hy en twee onderoffisiere glo een Saterdagoggend omstreeks 03:15 smoordronk van ’n casino na die basis teruggekeer het.
’n Aandklokreël wat van 18:00 geld, word streng toegepas.
Die veiligheidspersoneel van die Verenigde Nasies (VN) wou die luidrugtige drie aanvanklik glad nie tot die basis toelaat nie.
Hulle het die senior offisier vanweë sy hoë pos laat deurgaan, maar toe raak die drie slaags met die Militêre Polisie (MP’s) wat die Suid-Afrikaanse deel van die kamp bewaak.
Die offisier het die MP’s glo geskel en blitsvinnig hoër gesag in Pretoria gebel om die situasie te probeer ontlont.
Die MP’s het voortgegaan en die nodige verklarings vir ’n saak teen die drie afgeneem.
Dit is glo ook nie die eerste keer dat hulle die reëls verbreek terwyl die res van die kamp streng daarby moet hou nie.
Volgens ingeligtes is verskeie junior soldate in die verlede onmiddellik weens mindere klagte gerepatrieer, maar dié drie is ’n paar weke later steeds in die DRK.
Die MP’s word glo ook gedreig dat hulle na ’n afgeleë basis verplaas sal word as hulle die saak teen die drie probeer deurvoer.
Die offisier het volgens ondergeskiktes glo ’n ernstige dobbelprobleem en verwag gereeld van sy juniors om hom geld te leen om te gaan dobbel.
Siphiwe Dlamini, kommunikasiehoof van die departement van verdediging, het by navraag bevestig dat die drie vir oortredings van die gedragskode vervolg gaan word.
“Die militêre regsproses sal nou sy loop neem totdat die ondersoeke teen die drie afgehandel is.
Die besluit om iemand te repatrieer of nie is ’n bevelsbesluit (van hoër gesag) in oorleg met die VN.
In dié drie se geval sal repatriasie oorweeg word as ons al die feite van die voorval bekom het,” het hy gesê.
- Beeld