25 haweloos ná brande in Kaapstad
2012-01-22 16:54
Johannesburg – Altesaam 10 plakkershutte is verwoes en 25 mense is dakloos ná twee brande in Kaapstad, het die stad se rampbestuur gesê.
Wilfred Solomons-Johannes, ‘n woordvoerder, sê 'n brand het Saterdagaand om 22:00 in Ntanga-straat in Nozamo, naby Strand, uitgebreek. Altesaam 20 mense is haweloos gelaat nadat agt wonings afgebrand het.
Twee hutte het Sondagoggend om 09:30 naby die Strandfontein-polisiestasie afgebrand. Solomons-Johannes sê dié brand het vyf mense huisloos gelaat.
Niemand het enige beserings opgedoen nie.
Solomons-Johannes sê die rampbestuur sal slagoffers bystaan en kospakkies, komberse, klere en boumateriaal aan hulle verskaf.
Die oorsaak van die brande is nie bekend nie. Hy sê die polisie sal ondersoek instel.
Volg Nuus24 op Twitter
- SAPA