22 vas vir perlemoen in Wes-Kaap

2012-08-24 19:49

Johannesburg – Twee-en-twintig mans is in hegtenis geneem en daar is beslag gelê op byna 3 000 eenhede perlemoen in die Wes-Kaap in die afgelope twee dae, het die departement van landbou Vrydag gesê.

Agt mense is Vrydagoggend in hegtenis geneem toe hulle by Robben-eiland vir perlemoen geduik het, het die departement in ‘n verklaring gesê.

‘n Span beamptes van die departement het die enjins van die stropers se rubberboot geskiet nadat hulle teen die beamptes se boot vas gejaag het.

Vier duikers is in hegtenis geneem en vier ander het hulself op die eiland oorgegee.

Die rubberboot is gekonfiskeer en daar is beslag gelê op 416 perlemoene.

“Behalwe vir marine-verwante aanklagte wat teen die mans gebring sal word, is daar ook besluit dat weens die gewelddadige aard van die stropers se aksies sal ‘n saak van poging tot moord ook teen hulle aanhangig gemaak word,” het die departement gesê.

Die mans sal Maandag in die Kaapstad-landdroshof verskyn.

Beamptes van die departement het Donderdag drie mans gevang wat in Gansbaai vir perlemoen geduik het. Sestien ander het weggehardloop.

Dieselfde span het Donderdag omstreeks 20:15 ‘n silwer Nissan Maxima agternagesit.

Die bestuurder en ‘n passasier het uit die motor gehardloop. Die span het 1 761 eenhede perlemoen in die motor gevind.

“Oomblikke later op dieselfde pad het beamptes ‘n Nissan Hardbody afgetrek en die bestuurder en 10 passasiers in hegtenis geneem.”

Altesaam 343 eenhede van perlemoen is gekonfiskeer.

– Volg Nuus24 op Twitter

 

- SAPA