20 ongelukke binne 15 uur in Gauteng
2011-08-29 09:06
Amanda Roestoff en Hilda Fourie
Johannesburg - Nooddienswerkers in Gauteng moes die naweek bontstaan weens talle ongelukke in die provinsie.
André Visser, ’n woordvoerder van ER24, het gesê sowat 20 ernstige ongelukke is die naweek binne 15 uur aangemeld.
“Nooddienswerkers het hul hande behoorlik vol gehad,” het hy gesê.
Die meeste ongelukke het tussen Vrydag 17:00 en Saterdag 08:00 gebeur.
In Johannesburg, aan die Oos- en Wes-Rand is 2 mense in 6 ongelukke dood terwyl 22 mense beseer is.
Minstens 8 mense is in 7 botsings in Pretoria dood terwyl 16 beseer is.
In een van die grusaamste botsings is drie mense dood en een ernstig beseer nadat die bestuurder van ’n Volkswagen
Polo Sondagoggend in Garst- fonteinweg, in die ooste van Pretoria, in ’n boom vasgery het.
Kapt. Marissa van der Merwe, polisiewoordvoerder, het gesê die bestuurder van dié motor het vermoedelik aan die slaap geraak, waarna hy beheer daaroor verloor en dit in die boom vasgejaag het.
Die bestuurder, ’n 23-jarige man en twee passasiers, van onderskeidelik 24 en 25 jaar oud, is op die toneel dood terwyl nog ’n man (18) na die Steve Biko-hospitaal in Pretoria geneem is.
Nóg twee mans is Sondagmiddag dood en ’n man beseer toe hulle in Zambesirylaan, in die noorde van Pretoria, glo voor ’n vragmotor ingery het, het Jeff Wicks, woordvoerder van Netcare 911, gesê.
Wicks het gesê in ander botsings die naweek is ’n man Sondagoggend dood en ’n paartjie beseer ná ’n botsing reg van voor op die N1-snelweg naby die N4-oos-afrit.
Nog 2 mense is Saterdag dood en 12 is beseer in 4 afsonderlike botsings op die Bronkhorstspruitpad buite Pretoria, op die N14-hoofweg naby die R55-afrit, Pretoria-Noord en Centurion.
In Noordwes is drie mans in twee verskillende ongelukke op die R24-roete en die N4-hoofweg buite Rustenburg beseer.
’n Motorfietsryer (36) is Sondagoggend 11:30 ernstig beseer in ’n ongeluk op die R615 buite Brits.
Hy was besig om ’n Toyota Corolla verby te steek toe die motor gedraai en die motorfiets daarin vasgejaag het.
Die insittendes in die motor is nie beseer nie, maar die motorfietsryer is met ernstige kopbeserings na ’n hospitaal in Brits geneem.
Volg Nuus24 op Twitter.
- Beeld