2 vas na moord op polisieman
2009-10-16 15:40
Johannesburg - Twee mans is Vrydag in hegtenis geneem vir die moord op 'n verkeerspolisiebeampte.
Volgens Khabisi Mosonkutu, Gauteng se LUR vir gemeenskapsveiligheid, word die mans verdink van die moord op Simon Sebe, 'n beampte verbind aan Gauteng verkeerspolisie se teen-kapingseenheid.
Sebe is Woensdag in Kliprivier, Vereeniging, doodgeskiet toe hy 'n rooi VW Polo op die R558 naby die Heidelberg-afdraai gestop het.
Twee van die drie mans in die voertuig het sy wapen probeer afneem. Hy is in die stoeiery geskiet.
Die mans het weggejaag, maar twee is Vrydag in die Ekurhuleni-distrik vasgetrek ná 'n leidraad deur lede van die gemeenskap.
Die verdagtes het items in hul besit gehad wat met die misdaad gekoppel kan word, het Mosunkutu gesê.
Mosunkutu het die polisie gelukgewens met die inhegtenisnemings.
- Sapa