17 sterf in gru-botsing in Mpumalanga
2011-12-01 09:00
Nelspruit – Sewentien mense, insluitend 'n tweejarige kind, is dood nadat 'n taxi buite Belfast in Mpumalanga teen 'n vragmotor gebots het, het 'n beampte gesê.
"Reddingswerkers sny nog deur die wrak van die vragmotor om die insittendes te bevry," het Joseph Mabuza, woordvoerder van die provinsiale departement van gemeenskapveiligheid, gesê.
Die taxi, wat 17 mense vervoer het, het vermoedelik uit sy laan beweeg en teen die aankomende vragmotor gebots.
Die ongeluk het omstreeks 04:00 op die N4 buite Belfast plaasgevind.
Die vragmotor het die taxi gesleep en albei voertuie het aan die brand geslaan.
Mabuza het gesê 13 lyke is uit die taxi verwyder.
"Die lyke is onherkenbaar verkool."
Die taxi was vanaf Mosambiek onderweg na Johannesburg, terwyl die vragmotor vanaf Johannesburg na Nelspruit gereis het.
– Volg Nuus24 op Twitter
- SAPA