16 honde vergiftig
2010-04-13 06:31
Jody Nel en Johan Brits, Beeld
’n Gesin van Randfontein is erg geskok nadat hul drie troetelhonde oor die naweek vergiftig is, en naby Parys kry ’n diereliefhebber sielkundige behandeling nadat elf van haar honde dood is.
Willem Post (41) van Parkstraat, Randfontein, het Maandag gesê nie hy, sy vrou of sy twee kinders het ’n oog toegemaak sedert hul twee worshonde, Ore en Duppy (albei vier jaar oud), en Sascha (8 maande), ’n kruising tussen ’n Duitse herdershond en ’n chow, Saterdag dood is nie.
Hy vermoed drie seuns het die honde Saterdagoggend omstreeks 06:00 brood met gif ingegee. Sy buurvrou het gesien hoe die seuns die honde nader roep en brood voer.
Post het die honde omstreeks 07:30 op die erf gesien en dit het nie gelyk of iets met hulle skort nie. Skaars 20 minute later is Ore en Duppy albei dood.
Skuim het by Sascha se bek uitgekom, maar sy het nog geleef. Post het met haar na ’n veearts in Greenhills gejaag, maar dit was te laat om haar lewe te red.
Die veearts het al drie honde begrawe.
’n Ontstoke Post kan nie glo mense kan so ongevoelig wees as om onskuldige diere sonder rede te vergiftig nie.
“Hulle is my kinders. Hulle is my kinders se kinders,” het Post oor die honde gesê.
Op die plaas Tweespruit buite Parys is 13 honde en ’n kat vergiftig, vermoedelik deur motordiewe.
Daar was soveel gif in die vergiftigde vleis dat van die honde se bekke begin bloei het.
In ’n oogwink het die diere een vir een dood neergeslaan, vertel Antoinette Rens (50). “Dit was so onmenslik. Ek kry nou sielkundige behandeling,” het Rens gesê terwyl trane oor haar wange geloop het.
Rens sê 11 van die dooie honde was yorkshire-terriërs, een ’n jack russell en die ander een ’n tibet-terrier. Al die honde slaap in die plaashuis.
Die kat was die bure s’n.
Toe Fanie van Tonder, Rens se lewensmaat in sy voertuig wou klim om die polisie te ontbied, het hy agtergekom sy Ford Bantam is gesteel.
-Beeld