150 vulstasies in Jhb sonder petrol
2011-07-14 09:43
Johannesburg – Minstens 150 vulstasies in Gauteng en 50 in KwaZulu-Natal is sonder petrol, het die brandstof-kleinhandelaarsvereniging gesê.
"Dit was na afloop van Woensdag die syfers," het Reggie Sibiya, uitvoerende hoof van die brandstof-kleinhandelaarsvereniging, Donderdag gesê.
"Dit is slegs syfers wat aangemeld is. Sommige vulstasies wil uit vrees vir intimidasie niks aanmeld nie, so dit kan tussen 200 tot 250 vulstasies in Gauteng wees wat sonder petrol is."
Sibiya glo raffinaderye onderspeel die syfers.
Hy het gesê die landswye staking het die ekonomie lamgelê en laat sake-ondernemings "bloei".
"Brandstofhandelaars dryf handel op 'n gereguleerde bedrag. Ons kan nie die pomppryse verander nie en ons kan nie die koste (van die verlies) dek nie."
Sibiya het gesê geen vordering is gemaak met samesprekings nie.
"Ons is hulpeloos. Ons sien geen vordering nie en ons weet nie wanneer die staking gaan eindig nie."
"Dit is byna die einde van die week en ons is sonder uitslae."
Gary Ronald, woordvoerder van die AA, en John Appolis, beleidskoördineerder van die Chemical, Energy, Paper, Printing, Wood, and Allied Workers Union (Ceppwawu), het gesê hulle sal later kommentaar lewer.
Tania Landsberg, woordvoerder van Eskom, Nothemba Noruwana, woordvoerder van Sasol, en Glenda Zvenyika, woordvoerder van BP, was nie onmiddellik beskikbaar vir kommentaar nie.
Geen ooreenkoms is teen Woensdagaand bereik nie.
Werkers eis 'n minimum maandelikse salaris van R6 000 en 'n werksweek van 40 uur.
– Volg Nuus24 op Twitter
– Kliek hier om te kyk of daar petrol in jou gebied is.
- SAPA