15 lede moet nuwe TV-stelsel deurvoer
2010-08-23 08:16
Pretoria - ’n Raad is aangestel om toe te sien dat Suid-Afrika teen middel 2015 ten volle van analoog- na digitale TV-uitsendings oorgeskakel sal wees.
Die minister van kommunikasie het Vrydag die 15 lede van die nuwe Digital Dzonga-adviesraad, wat dié proses moet bestuur, bekend gestel.
Genl. Siphiwe Nyanda het by die bekendstelling in Hatfield, Pretoria, gesê dié 15 lede sal as raadgewers onder die minister dien om die ingewikkelde proses van Suid-Afrika se migrasie van analoog-uitsaaidienste na nuwe digitale tegnologie bekend as digitale terrestriële televisie (DTT) te bestuur.
“Dié adviesraad het ’n groot taak om te verrig en hulle sal baie verantwoordelikheid dra, maar ons is vol vertroue dat hulle die oorskakeling seepglad sal laat verloop,” het Nyanda gesê.
Prof. Mamokgethi Setati, uitvoerende dekaan van die departement wetenskap, ingenieurswese en tegnologie aan Unisa, is as voorsitter van die adviesraad aangewys.
Ruddy Rashama, uitvoerende direkteur van Khemano Productions, wat by die Afrika-unie se DTT-proewe betrokke was, is die ondervoorsitter.
Die 15 lede van Digital Dzonga is gekies uit sowat 51 benoemdes uit ’n verskeidenheid van agtergronde – insluitend regulering, seinverspreiding, uitsending, die reg, verbruikersgroepe en die regering.
’n Paneel onder leiding van Dina Pule, adjunkminister van kommunikasie, het al die benoemdes oorweeg en onderhoude met hulle gevoer.
Nyanda het gesê die adviesraad sal blitsig aan die werk moet spring.
“Hulle gaan aan die diep kant ingegooi word, want daar is baie werk om te doen, maar ons het vertroue in hulle,” het Nyanda gesê.
Dr. Harold Wesso, waarnemende direkteur-generaal van kommunikasie, het gesê die kabinet het in Februarie 2007 besluit Suid-Afrika moet teen 17 Junie 2015 na ’n digitale uitsaaistelsel oorgeskakel wees.
“Dié datum is deur die unie vir internasionale telekommunikasie (ITU) voorgeskryf as die datum wanneer analoog-uitsendings afgeskakel behoort te word,” het Wesso gesê.
“Ons het die doelwit gestel om reeds teen November volgende jaar alle analoog-seine af te skakel en die nuwe digitale seine te aktiveer.
“Ons glo steeds dit is ’n realistiese doelwit.”
Die nuwe DTT-stelsel sal vereis dat alle TV-kykers landwyd ’n dekodeerder, waarvan die prys nog onbekend is, sal moet aanskaf om digitale uitsendings te kan ontvang.
Wesso het gesê die regering gaan 5 miljoen arm gesinne identifiseer wat van gratis dekodeerders voorsien sal word en
R400 miljoen is hiervoor begroot.
- Beeld