15 honde dood van gif
2009-07-22 08:33
André Damons
Altesame 15 van hul honde is gisteroggend deur inwoners van Princessweg in Claremont, Johannesburg, dood gevind.
Al die troeteldiere is in die vroeë oggendure vergiftig, vermoedelik deur iemand wat by twee motors in die straat ingebreek het.
Me. Chrissie Vermaak (52), het eerste bewus geword van die slagting en die vergiftiging as barbaars en wreed beskryf.
By Beeld se besoek aan die toneel het tien van die honde dood op die sypaadjie gelê.
Me. Charlene Willemse (37) se drie Jack Russells en haar Duitse herdershond is ook vergiftig. “Dit is baie hartseer en ’n groot skok. Honde is mos maar soos jou kinders,” het sy gister gesê.
Me. Leatetea Beyers (27) het gesê die honde moes voor 04:00 vergiftig gewees het.
“Ek was 03:00 buite; toe het die honde nog gelewe. Dit moes daarna gebeur het. Ons het nog gesien hoe een van die honde vanoggend (gisteroggend) doodgaan. Dit is nie lekker om so iets te sien nie,” het sy gesê.
Volgens haar is daar met die hond na die Dierebeskermingsvereniging in Maraisburg, Roodepoort, gejaag, maar daar was nie veeartse nie. Op pad na ’n ander veearts is die hond dood.
Daar is by twee motors in die straat ingebreek en die radio’s is gesteel.
Mnr. Alpheus Molele, wat ook in die straat woon, het ’n man gejaag toe hy hom met ’n radio gesien loop het, het sy vrou, me. Mariam Mokoke, gesê. “Omstreeks 03:30 het my man voetstappe buite gehoor en deur die venster gekyk en die man gesien. Hy het uitgehardloop en agter die man aangehardloop. Ek het gewonder hoekom die honde so stil is,” het Mokoke gesê.
Mnr. William Botha woon in dieselfde straat en vermoed die wit poeier wat hy in sy erf gevind het, is die gif wat gebruik is om die honde te vergiftig. Hy is bly sy twee hondjies slaap in die huis, het hy gesê.
Me. Yvonne Stones van die DBV in Roodepoort het gesê die hond is weggewys omdat hul veearts eers 07:30 op kantoor kom. Daar was een inspekteur by die kliniek, maar dié persoon kan glo nie sonder ’n veearts met medisyne werk nie.
Die mense was voor 07:00 by die DBV-kantore.
“Die veiligheidswagte het die mense na ’n dierekliniek sowat tien minute weg verwys, want hulle het gevrees die hond kan doodgaan as hulle vir die veearts moet wag,” het sy gesê.
Kapt. Frans Langeveldt, polisiewoordvoerder, kon nie gister die voorval bevestig nie.