15 000 mense by Malema-nagwaak verwag
2012-09-25 21:34
Polokwane – ‘n Paar ondersteuners van Julius Malema, die geskorste leier van die ANC-jeugliga, het Dinsdagaand by die Nirvana-gemeenskapsaal in Polokwane saamgekom vir ‘n nagwaak voor sy hofverskyning.
Teen 20:00 het ‘n klein groepie jongmense, sommige in ANC-klere, in die koue saamgekom waar hulle revolusionêre liedjies in die saal gesing het.
Klaas Mabunda, woordvoerder vir die ANC-jeugliga in Limpopo, het aan verslaggewers gesê dat 15 000 mense na verwagting die nagwaak ter ondersteuning van Malema sal bywoon.
Tien busse word verwag van elke substreek in die provinsie.
Mabunda sê die ondersteuners sal sing en dans tot sonsopkoms en sal Woensdagoggend van die saal na die Polokwane-landdroshof beweeg.
Malema sal later Dinsdagaand, wanneer meer ondersteuners opgedaag het, geroep word om met hulle te praat, het hy gesê.
Malema sal homself glo Woensdagoggend om 08:15 aan die polisie oorgee voor sy hofverskyning.
Mabunda sê Malema sal na verwagting toesprake voor en ná sy hofverskyning maak.
Hy sal op aanklagte van bedrog en geldwassery in verband met sy Ratanang-familietrust verskyn.
– Volg Nuus24 op Twitter
- SAPA
