13 000 sê nee vir pornografie
2010-03-03 19:06
Johannesburg – Meer as 13 000 mense het nee gesê vir pornografie op DSTV in ‘n veldtog wat die bekendstelling van ‘n 24-uur pornografie-kanaal teenstaan, het die vakbond Solidariteit Woensdag gesê.
Sommige bekendes het ook hul name tot dié internet en sms veldtog gevoeg.
Solidariteit het dié veldtog, Helping Hand, geloods nadat MultiChoice aangekondig het dat dit oorweeg om ‘n pornografie-kanaal beskikbaar te stel.
Jackie Rakitla, woordvoerder van MultiChoice, sê ‘n opname is gedoen om vas te stel of daar ‘n mark is vir pornografiese kanale, nadat hulle “oorstroom” is met versoeke vir sulke beeldmateriaal.
Solidariteit voel dat so ‘n kanaal die regte van kinders oortree omdat dit nie in die belang van kinders is nie. Volgens Helping Hand se navorsing gebruik 77% van mense wat seuns molesteer en 87% van mense wat dogtertjies molesteer porngrafie om die dade daarin op hul slagoffers uit te oefen.
Danie Langner, die uitvoerende hoof van Helping Hand, sê pornografie spoor sulke dade aan en seksuele aanranding sal verhoog as dit vrylik beskikbaar is.
- Sapa