11 jaar in pyn oor klemtang in buik
2011-08-03 08:25
Bloemfontein – ’n Eis van miljoene rande gaan teen ’n chirurg en die Vrystaatse provinsiale regering ingestel word nadat ’n chirurgiese klemtang van 18 cm lank in ’n voormalige Bloemfonteinse verkeersman gelos is.
Die glips is begaan toe hy ’n breukoperasie in die Universitas-hospitaal in Bloemfontein ondergaan het.
Hennie Muller (61), nou van Midrand, het 11 jaar lank in groot pyn en ongemak met die klemtang teen sy maagwand geloop totdat dit in ’n maagbreukoperasie in ’n hospitaal in Pretoria gekry en uitgehaal is.
Hy het gister gesê hy het onbeskryflike pyn beleef. As hy beweeg het, was dit seer.
“Dit was verskriklik.
“’n Mens besef nie aldag hoe jou maagspiere werk nie. As jy beweeg, trek dit aan jou maag.”
Hy het gesê hy het voorheen gedoen wat hy wou en in sy tuin gewerk.
Ná die operasie in 1998 in die Universitas-hospitaal kon hy nie eens gras sny nie.
Hy was in daardie stadium in Ladybrand, waar hy en sy vrou, Antoinette, ’n onderneming gehad het wat chemiese skoonmaakmiddels verkoop het.
Hy kon die 25 liter-houers eers maklik hanteer. Ná die operasie kon hy nie meer nie.
Weens sy mediese toestand het hy dié onderneming later maar verkoop.
Hy het in ’n stadium vir ’n vriend ’n vragmotor bestuur om groente tussen Johannesburg en Bloemfontein te karwei. Ná drie maande moes hy tou opgooi weens die maagkrampe en -pyne.
Later het hy en sy vrou by sy seun in Pretoria gaan woon waar sy vrou werk gekry het.
“Ek het op ’n ander man se genade gelewe. Ek het probeer werk, maar kon nie.
“’n Mens voel hulpeloos en magteloos. Jy voel gekrenk omdat jy van ander afhanklik is.”
Ná die maagbreukoperasie in November 2009 in Pretoria waarin die klemtang ook verwyder is, gaan dit beter. Daardie erge pyn is weg.
Almal was baie verbaas oor dié vonds wat tydens die operasie na vore gekom het.
Muller is nou ’n koshuisvader op ’n hoewe in Midrand, waar hy ook woon.
Koos du Toit, van Du Toit-prokureurs in deelgenootskap met Callis-prokureurs, sê Muller se eis word nou na ’n aktuaris verwys om die presiese eisbedrag te bepaal.
– Volg Nuus24 op Twitter.
- Beeld