107 vas vir vrou se gifdood

2013-01-09 09:34

Johannesburg – Altesaam 107 mense is Dinsdag in hegtenis geneem omdat hulle na bewering ‘n vrou in haar huis in Madadana, naby Bizana, vergiftig het, het die polisie in die Oos-Kaap gesê.

‘n Groep plaaslike inwoners het Maandag die 49-jarige vrou genader en haar daarvan beskuldig dat sy ‘n man wat verlede maand ‘n tiener verkrag en vermoor het, in haar huis laat wegkruip het, het kapt. Mlungisi Mathidane gesê.

Hulle het die vrou na bewering gedwing om gif te drink. Sy het later gesterf nadat sy van maagkrampe gekla het. ‘n Saak van moord is toe geopen.

Die groep – 38 mans en 69 vroue – sal Woensdag in die Bizana-landdroshof op aanklag van moord verskyn.

Die vermeende verkragter is verlede week in hegtenis geneem en het sedertdien in die hof verskyn. Hy is steeds in polisie-aanhouding.

Volg Nuus24 op Twitter

- SAPA