Minder as 1000 misdade by WB-plekke gepleeg
2010-07-15 15:15
Pretoria – Net minder as 1000 misdade is aangemeld in en om die land se stadions op wedstryd-dae gedurende die Wêreldbeker-sokkertoernooi, het Nathi Mthethwa, minister van polisie, Donderdag gesê.
Die meerderheid van hierdie misdade was diefstal en rooftogte, het Mthethwa aan die media in Pretoria gesê.
‘n Totaal van 704 misdade is buite die stadions gepleeg, terwyl 290 in stadions gebeur het.
“Ons het spesifiek gefokus op misdade binne ‘n 1,5km-radius van sekere plekke,” het Mthethwa verduidelik.
Sowat 1788 misdade is by die jolkolle aangemeld, waar daar sowat 1,2 miljoen sokkergeesdriftiges opgedaag het.
“Hierdie syfers bewys dat sekuriteit goed was,” het hy gesê.
Hy het verduidelik dat die syfers slegs misdade verteenwoordig wat by die polisie aangemeld is en dat daar nie noodwendig ‘n dossier vir elkeen geopen sal word nie.
Van die 1002 dossiere wat geopen is, is 558 sake afgehandel en word die res ondersoek.
Sowat 447 persone is tydens die toernooi in hegtenis geneem, waarvan 181 buitelanders was en 266 Suid-Afrikaners.
Sommige van die buitelanders is reeds gevonnis.
Sowat 44 000 polisiebeamptes is tydens die toernooi regoor die land ontplooi.
Volg Nuus24 op Twitter.
- SAPA