1 uit 10 in SA tevrede met dienste
2011-04-01 07:54
Kaapstad - Slegs een uit elke tien Suid-Afrikaners is tevrede met die gehalte van dienslewering deur distriks- en munisipale owerhede.
Dit is ’n drastiese afname sedert 2006 toe dié syfer op amper vier uit elke tien, of 39,5%, gestaan het.
Dit blyk uit ’n studie wat gedoen is deur die Instituut vir Demokrasie in Suid-Afrika (Idasa) wat Donderdag, sowat twee weke voor die munisipale verkiesing op 18 Mei, bekend gemaak is.
Van die redes wat aangevoer word vir dié ontevredenheid is die drastiese verswakking van basiese dienste soos water- en elektrisiteitsverskaffing en behuising.
Idasa het 2 375 volwasse Suid-Afrikaners in 21 munisipaliteite in Mpumalanga, Limpopo, KwaZulu-Natal en Noordwes hieroor genader.
Paul van der Hoof, redakteur van die verslag, het gesê die doel van die peiling was om van gewone Suid-Afrikaners te hoor hoe plaaslike regerings oor die laaste vier jaar gevorder het.
“Die peiling toon dat die gaping tussen dié wat regeer en diegene wat regeer word ál groter word.”
Altesaam 70% van deelnemers het aangedui dat hul munisipaliteit nie dienste van goeie gehalte lewer nie. Wanneer die vier provinsies vergelyk word, is die vlak van tevredenheid met dienste die hoogste in Limpopo (15%) en die laagste in Noordwes, met ’n skrale 5%.
Volgens Van der Hoof kan drie redes aangevoer word vir die groter ontevredenheid sedert 2006:
1. Die gaping tussen verwagtings en wat die regering realisties kan lewer, is aan die toeneem, onder meer weens migrasie en bevolkingsgroei.
2. Rade pak nie belangrike kwessies aan wat deur burgers geïdentifiseer word nie.
3. ’n Groter bewustheid bestaan oor swak kommunikasie, gebrek aan deursigtigheid en verhoogde korrupsie en nepotisme.
- Volksblad