Dit is sewe-uur, en tyd vir Stemband.
2010-08-25 20:29
In-diepte Verslae
Moses Metro Man, die nuutste Afrikaanse groep van Potch, vertel hoeveel geduld en McDonald’s burgers dit vat om ‘n album op te neem.
By die Matt Black-sessions en DPK se Bob en sop-aand het veral een Bob dinge oorheers, soos BobbeJan Gerber uitgevind het.
So, Stemband is nou amptelik op die lug.
‘n Mens mag dalk vra, hoekom?
Wel… dis ‘n goeie vraag. Ons is ook nie seker nie.
Ons het nie marknavorsing gedoen nie en ons weet nie regtig wat ons doen nie.
Maar kykhie, ‘n kommerwekkend hoë persentasie van ons dae gaan daarin om oor die local scene te stry en baklei en vry (met ander mense).
Teen vroegdag is die kernvraag iets soos of City Bowl Mizers of die Pretty Blue Guns beter opstaan-musiek is. (Gevolgtrekking – dit hang af wat jy die vorige nag gedoen en saam met wie jy wakker geword het).
Teen laatmiddag begin die alomteenwoordige, allesoorrompelende biersmagting al seer maak… sal Zinkplaat die inleiding vir ons kuiersessie wees, of die Heuwels? Of is albei eintlik net bedoel vir road trips? (Gevolgtrekking – nee, nie noodwendig nie, maar ‘n mens kan ook nie voorspel wanneer daai tunes en woorde jou in die buik gaan tref nie.)
Teen laatnag is Willim Welsyn en dies sulks die tequila in die shotglas, aKing is die classy bier en daai donker mengsel goed wat iemand in jou hand stop as ‘n strafdop, is.. Van Coke Kartel?
En dan’s dit al weer vroegdag. En dan moet jy seker ophou om jou metafore en argumente net rondom drank te bou.
Uhm…
Hier’s ‘n prentjie van ‘n beer wat op ‘n haai se rug ry.
Befok, né.
So die punt is, ons soek ‘n platform. Jy soek ‘n platform. Jy luuurv musiek, anders sou jy nie op hierdie site gewees het nie. Jy weet wie is cool en jy weet wie suig.
Oftewel, jy dink so (slinkse lag).
So hier is dit. Stemband is ‘n community wat deur Nuus24 ge-host word. En ‘n community is presies dit, ‘n gemeenskap waar ons mekaar kan ontmoet, opdonner, verlief raak (Herman is single), happysad raak, all to the tune of the almighty tune.
Ons launch met ‘n paar stories wat ons en ‘n paar kamerade opgedis het.
Die ex-expat Aletta Gardner skryf oor haar terugkeer na Suid-Afrika, ná ‘n prille jeug in Engeland, en haar summiere optrek na Oppikoppi.
Jan Gerber ondersoek hoe braakselsmeersel en Willim Welsyn verbonde is.
Wilken Calitz ontdek ‘n portaal na die verlede (of ‘n diep vreemde toekoms) by Kleinmond se bazaar.
Ons eie Liezl Temmingh pluk Foto Na Dans se nuutste uit die omhulsel en pomp die volume. Sy kyk ook New Holland se Kwaito-vibe uit.
Ons eie Herman Eloff se brein raak lam vir Ashtray Electric se nuwe projekte. En hy loop 'n Randomfakenpanda raak.
Ons eie Henry Cloete het nog nie eintlik enigiets gedoen nie, maar hy’s ook hier rond.
Kyk, dis net die begin. Ons soek jou stories, jou idees, jou foto’s. Dis soos om vir Rolling Stone te skryf, net baie meer so. Eksponensieël. Rolling Stonerder.
Hierdie is,weereens, net die begin.
Skryf! Reviews, gigs, herinneringe, vooruitsigte, emosies, o, emosies! Stuur foto’s, gesels, die forums gaan binnekort oopgegooi word en dan is die wêreld jou niknak.
Stuur jou goed na Stemband@nuus24.com. Onsselwers werk almal hier rond en soek afleiding. En harde kitare.
Geen Juanita’s of Juanita-tipes toegelaat nie. Dieselfde geld Nicholisse en basies enige kunstenaar wat net met ‘n voornaam funksioneer.
Hier’s ‘n hele klomp spif goed op pad… byvoorbeeld, ‘n studio diary van aKing (eksklusief vir Stemband) is in die pyplyn...
Die site se voorkoms sal ook evolve met tyd.
Da’sy, laat waai!
Henry Cloete, Herman Eloff en Liezl Temmingh.
(Die Stemband-span...dex)
PS check ook Stemband se facebook en twitter uit.
PPS innige dank aan Jaco Grobbelaar vir die kief logo.