’n Groen-en-Goue kans
2010-03-05 09:57
In-diepte Verslae
Die beseerde losvoorspelers CJ Stander en Dewald Potgieter kan straks gekies word vir die Bulls se Super-stryd teen die Chiefs in Hamilton.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Stephen Nell
Kaapstad - Is ’n ontydige toets teen Wallis in Cardiff ’n week ná die Super14-eindstryd nét die kans waarvoor ’n speler soos die Stormers-flank Francois Louw dalk wag?
Suid-Afrikaanse rugbybase is geroskam oor hul besluit om nog ’n toets op 5 Junie op die program in te pas, maar die Springbok-afrigter, Peter de Villiers, kan dit tot sy voordeel aanwend deur sy diepte uit te bou met die oog op aanstaande jaar se Wêreldbeker-toernooi in Nieu-Seeland.
Dit is nie nét ’n wetenskaplike opinie dat dieselfde spelers nie deurentyd kan speel nie, maar óók dat Suid-Afrika sy diepte móét uitbou.
“Onthou dat die Springbok-groep nou vier jaar ouer is. Hulle (die spelers) sal nie weer vir ses wedstryde in ’n ry (in ’n Wêreldbeker-toernooi) die pyp kan rook nie. Suid-Afrika sal diepte móét bou en nog 8 tot 10 spelers vind wat in twee wedstryde in die toernooi kan speel,” het die sportwetenskaplike prof. Tim Noakes onlangs in ’n onderhoud met Sport24 gesê.
Dit beteken De Villiers kan vanjaar se 14 toetse tot sy voordeel aanwend as Noakes se raad toegepas word.
Terselfdertyd moet staatmakers en gereelde uitblinkers wat hulle nie tussen die gekontrakteerde Springbokke bevind nie, die kans aangryp om vir Suid-Afrika ’n betekenisvolle tweede linie te gee. Top-Bokke wat oorsee vir hul klubs uitblink, kan maklik ook in berekening kom.
Louw (24) was ongelukkig om nie in November 2009 saam met die Springbokke na Europa te toer nie, maar al wat hy kan doen, is om te volhard met die goeie vertonings wat hy week ná week lewer.
“Ek fokus maar op my eie spel en poog om elke seisoen te verbeter. Of jy vir die Bokke gekies word, sal van jou vertonings afhang,” sê Louw.
Wat môre se kragmeting met die Highlanders op Nuweland betref, meen Louw die Stormers se groot uitdaging is om hul kanse beter as teen die Brumbies te benut.
“Die fokus gaan op uitvoering wees. Ons het beslis verlede naweek ons kanse gehad, so afronding is uiters belangrik.
“Ek dink ook nie ons het voldoende die opsie van ons voorspelers gebruik nie. Ons het gepoog om uit ons eie helfte te hardloop eerder as om vir die hoeke te mik en rolmaalbewegings van dáár van stapel te stuur.”
Louw meen die strenger toepassing van reëls het sy taak moeiliker as vantevore gemaak. “Dis beslis besig om aanvallende spanne te bevoordeel. Dis moeilik vir die verdedigende span om sy hande op die bal te kry, laat staan nog om omkeerbesit te wen. Baie strafskoppe word afgestaan en ons sal moet aanpas.”
Louw verwag die All Black-losvoorspeler Adam Thomson sal taai teenstand bied. “Hy gaan beslis lastig by die afbreekpunte wees.
“Hy gaan poog om ons bal stadig te maak en te steel,” sê die staatmaker.
Dis van “kritieke belang” dat die Stormers weer op die wenpad kom ná die nederlaag teen die Brumbies. “Ons het onsself in die steek gelaat ná ’n puik vertoning teen die Waratahs.
Die Highlanders se beginspan is onveranderd van die een wat die Cheetahs geklop het.
- Die Burger