Waratahs skrik nie vir vlugflouheid
2010-05-18 06:32
In-diepte Verslae
Die Western Force was te sterk teen die Lions tydens hul Vodacom Super-rugbywedstryd by die NIB-stadion in Perth.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Durban. – Hoewel geen Australiese rugbyspan nog in die uitkloprondes van die Super-reeks in Suid-Afrika kon seëvier nie, meen Chris Hickey, breier van die Waratahs, ’n sege is nie so vergesog nie.
Die Waratahs pak die Stormers Saterdag in Kaapstad in die halfeindstryd van die Super14-reeks en volgens Hickey sal vlugflouheid beslis nie sy span onderkry nie.
“Daar is geen geheim daaraan om hier te wen nie. Jy moet net jou reisreëlings so goed as moontlik bestuur en ons mense weet wat hulle doen.
“Die eerste helfte van die week gaan daaroor om te herstel van die vlug en die vorige wedstryd en daarna sal ons seker twee oefensessies inwerk,” het hy Maandag hier aan AAP gesê.
Die Waratahs sal Dinsdag ’n ligte oefensessie hê, Woensdag af vat en Donderdag ’n harde sessie insit.
Die besoekers sal vandeesweek hier, weg van afleidings in die Kaap, vir die kragmeting voorberei en eers Vrydag na die Moederstad koers kies.
Hoewel baie meen die Waratahs en Crusaders, wat teen die Bulls in Soweto in die ander halfeindstryd speel, se reisreëlings sal ’n invloed op die uitslag hê, stem Hickey nie saam nie.
“Dis beslis ’n lang vlug. Jy reis sowat 20 uur van die een hotel tot die volgende. So dis lekker om dit agter ons te sit.
“Dis nooit ideaal nie, maar ons het dit al ’n paar keer gedoen en raak elke keer beter met die bestuur daarvan.”
Hickey sê Durban is as basis gekies sodat sy spelers se aandag nie onnodig afgetrek word nie.
“Ek dink dis beter om hier en nie in Kaapstad voor te berei. Dis bietjie stiller.”
Hy meen sy span sal ’n groot kans staan as hy fisiek en sielkundig oorgehaal is vir die wedstryd.
Volgens hom is ’n tuis-eindstryd vir die Tahs ook nie buite rekening nie.
“As die Crusaders die Bulls klop en ons wen, sal dit ideaal wees.”
Intussen het die Waratahs ’n hupstoot gekry nadat die Wallaby-haker Adam Freier van ’n dyspierbesering herstel en saam met sy spanmaats gereis het.
Volgenswww.smh.com.au het Freier, wat as plaasvervanger kans sal kry as Damien Fitzpatrick nie van ’n kniebesering herstel nie, vanjaar weens beserings slegs een Super14-wedstryd gespeel.
-newsnow.co.uk
-Sport24