Waratahs ‘nou veel beter span’
2010-05-17 10:35
In-diepte Verslae
Die Western Force was te sterk teen die Lions tydens hul Vodacom Super-rugbywedstryd by die NIB-stadion in Perth.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Kurtley Beale se briljantheid op heelagter en aanpassing by die nuwe vertolking van die reëls maak van die Waratahs ’n aansienlik beter rugbyspan as die een wat vroeër vanjaar op Nuweland verloor het.
Dít was die waarskuwing van die Stormers se afrigter, Allister Coetzee, aan sy spelers nadat sy span ’n tuishalfeindstryd teen die Aussies losgeslaan het deur die Bulls Saterdag op Nuweland met 38-10 te klop.
Die Stormers en die Waratahs het in die tweede week van vanjaar se Super14-rugbyreeks laas ontmoet, met die Kapenaars wat met 27-6 baas was.
Dit was die Waratahs se grootste nederlaag in vanjaar se reeks.
Beale het daardie dag binnesenter gespeel, maar het die Waratahs se laaste sewe wedstryde in die nr.?15-trui begin.
Hy het in sy laaste drie wedstryde vier drieë gedruk, insluitend twee in die naweek se oorwinning van 32-16 oor die Hurricanes.
“Die Waratahs het baie verbeter en met die sege die naweek gewys hoe goed hulle is. Hulle het ’n groot pak en in Beale ’n speler wie se spelpeil besonder goed is,” sê Coetzee.
“Ons het die Waratahs in die derde ronde seergemaak, maar hul losvoorspelers het toe nog nie by die nuwe vertolking van die reëls aangepas nie.
“Dit gaan ’n ander Waratahs-span wees en ons taak is om toe te sien dat die spelers met dieselfde fisieke intensiteit speel as die naweek teen die Bulls.”
Die Waratahs gaan die beduidende nadeel van vlugflouheid hê. Hulle het gisteroggend uit Sydney vertrek.
’n Liplekker Suid-Afrikaanse eindstryd wag op 29 Mei as die Stormers en die Bulls vandeesweek wen, maar Coetzee wil sy span se fokus op die volgende taak hou.
“Ons benadering is dat dit elke week ’n eindstryd is.
“Die spelers besef dis ’n wrede reeks. Jy kan nie jou konsentrasie laat glip en te ver in die toekoms in kyk nie,” sê hy.
“Die spelers moet hul klein doelwitte op die veld bereik.
“Matt Proudfoot (voorspeler-afrigter) moet seker maak die skrums verloop goed, sou Benn Robinson en Al Baxter (Wallaby-stutte) vir die Waratahs speel.”