‘Waar is die spelers?’
2011-04-25 08:15
In-diepte Verslae
Die Western Force was te sterk teen die Lions tydens hul Vodacom Super-rugbywedstryd by die NIB-stadion in Perth.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg – Die tyd vir groot praatjies oor noemenswaardige speleraanwinste is verby. Waar is die spelers?
Dít was Saterdagaand die Lions-afrigter, John Mitchell, se uitdaging aan die skatryk vennote van die Goue Leeus Rugbyunie (GLRU) nadat die Lions hul negende wedstryd in vanjaar se Super Rugby-reeks verloor het.
“Daar is ’n kultuurprobleem wat al lank hier is. Dit is duidelik dat ons moet belê vir die toekoms.
“Die beleggers sal ongetwyfeld hul geld moet laat praat,” het Mitchell ná die nederlaag van 30-34 teen die Chiefs gesê – ’n nederlaag wat die Lions onderaan die reeks se puntelys laat.
Mitchell, ’n afrigter wat selde doekies omdraai as hy sy mening lug, se bouproses is niks nuuts in Leeu-kontrei nie en vorige “bouprosesse” onder afrigters soos Loffie Eloff en veral Dick Muir het dadels opgelewer.
Ofskoon Mitchell uiters beïndruk is met die talent wat die unie tot sy beskikking het, het hy al by verskeie geleenthede gesê sy span het ’n paar spelers van wêreldgehalte in sleutelposisies nodig voordat die unie daarvan kan droom om ’n pasaangeër op die hoogste vlak te wees.
“Ons het ’n baie goeie grondslag van spelers hier – uiters goeie rugbyspelers.
“Ongelukkig het die meeste van hulle nou maar hul 10de of 11de Superrugby-wedstryd gespeel en moet hulle op die harde manier leer,” het Mitchell gesê.
Sedert Robert Gumede en Ivor Ichikowitz einde verlede jaar 49% van die aandele in die GLRU verkry het, het hulle ondersteuners laat regop sit deur te sê hulle wil van die GLRU die “Real Madrid van rugby” maak.
Ofskoon die werwing van spelers soos Rory Kockott, Lionel Mapoe en Bandise Maku die span versterk het, is hy nog nie naastenby met supersterre gelaai nie.
Daarenteen was die mees onlangse verliese van Willem Alberts, Jaque Fourie, Heinke van der Merwe en Louis Ludik ’n gevoelige slag.
Dit lyk in dié stadium of geen Lions-speler Suid-Afrika se Wêreldbeker-groep gaan haal nie.
Butch James sluit hom aanstaande maand by die Lions aan, maar staan in die skemer van sy loopbaan.
Die moontlike koms van Frans Steyn klink meer soos ’n Real Madrid-transaksie, maar leemtes tussen veral die vaste vyf gee die Lions ’n agterstand op topvlak.
Daar was wel pogings om spelers soos Tendai Mtawarira, John Smit en Andries Bekker te lok, maar dit het gefaal en gevolglik sukkel die span steeds om aan die eise van Super Rugby te voldoen.
– Sport24
Bly op hoogte van al die jongste sportnuus deur Nuus24Sport op Twitter te volg