‘Vuvuzelas kan nie seermaak’
2010-05-25 10:15
In-diepte Verslae
Die Western Force was te sterk teen die Lions tydens hul Vodacom Super-rugbywedstryd by die NIB-stadion in Perth.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Vuvuzelas word nie op Nuweland toegelaat wanneer die Stormers speel nie, maar die Bulls en hul ondersteuners sal ’n fout begaan om te dink dat hul nuwe “Speler 23” die Stormers-rugbyspan van stryk gaan bring.
“Dis ’n Super14-eindstryd tussen Suid-Afrikaanse spanne en wat ook al daarmee saam kom – die vuvuzelas en al die opgewondenheid – moet ons omhels,” sê die Stormers se afrigter, Allister Coetzee.
“Ons het ’n gesegde in die span en dis om die eksterne faktore uit te blok.”
Die Stormers se losskakel en stelskopper, Peter Grant, sal die druk die ergste voel.
Hy is naas Matt Giteau die akkuraatste stelskopper in vanjaar se Super14-reeks, maar kan waarskynlik ’n oorverdowende vuvuzela-lawaai verwag wanneer hy Saterdag pale toe korrel.
“Die stelskoppers is vertroud met die druk wat met die taak gepaard gaan en moet regtig net fokus op wat gedoen moet word – om die bal deur die pale te skop,” sê Coetzee.
“Die vuvuzelas kan jou nie seermaak nie. Dit kan baie lawaai maak, maar kan jou nie duik nie. Peter het al gewys dat hy die druk kan hanteer.”
Grant het inderdaad nie veel probleme met Hamilton se kettingsae en koeiklokke ervaar toe die Stormers die vloer met die Chiefs gevee het nie, so waarom dan skrik vir vuvuzelas?
Om koelkop te bly, is inderdaad een van die Stormers se grootste uitdagings. Die Crusaders kon dit nie Saterdag in Soweto teen die Bulls doen nie en het met 24-39 verloor.
“Hierdie is ’n baie goeie Bulls-span en jy moet net nie toelaat dat hulle jou van stryk bring nie,” sê Coetzee. “Dis wat met die Crusaders gebeur het. Ons het gesien hoe goeie spelers soos Colin Slade, Sean Maitland en Dan Carter die bal aanslaan. Hulle het foute begaan vanweë die druk.”
As die Stormers dit gaan doen, sal hulle veral die Bulls se skoptaktiek die hoof moet bied.
“Hulle het baie goeie skoppers in Fourie du Preez, Morné Steyn en Zane Kirchner. Hulle maak gebruik van hangskoppe en jaag dit baie goed,” sê Coetzee.
“Die meeste ander spanne in die Super14-reeks kon dit nie hanteer nie. Die All Blacks kon dit nie eers verlede jaar hanteer toe hulle teen Fourie en Morné gespeel het nie, maar ons sal móét. Ons ken die plan en die ingesteldheid en hopelik gee dit ons ’n beter kans om mededingend teen hulle te wees.”
Bly op hoogte van al die jongste sportnuus deur Nuus24Sport op Twitter te volg.
- Sport24