Vuurwarm-stryd tussen lostrio’s
2011-03-31 09:32
In-diepte Verslae
Die Western Force was te sterk teen die Lions tydens hul Vodacom Super-rugbywedstryd by die NIB-stadion in Perth.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Op Schalk Burger se laaste besoek aan die Haaitenk, is sy ribbes só sleg deur Willem Alberts beseer dat hy die Springbok-rugbytoer na Brittanje en Ierland moes misloop.
Sulke dinge gebeur natuurlik op ’n rugbyveld en die Stormers se kaptein sal nie kwade gevoelens hê wanneer hy Saterdag in die Super Rugby-wedstryd teen die Sharks opdraf nie.
Wat Burger en die res van die Stormers egter nou al uit ervaring weet, is dat ’n wedstryd teen die Sharks groot fisieke, taktiese én tegniese eise stel.
En dis eise wat die Westelike Provinsie en die Stormers in hul kragmetings verlede jaar in Durban bloot nie aan kon voldoen nie.
Die Sharks het die Stormers verlede jaar daar met 20-14 geklop en die Haaie het die WP met 30-10 in die Curriebeker-eindstryd verslaan.
“Verlede jaar is nog vars in die geheue,” het die Stormers se terugkerende kaptein gister gesê.
“Ons is in albei wedstryde daar uitoorlê en fisiek oorheers. Dis seker maar ’n soortgelyke sielkundige hekkie as wat ons teen die Bulls gehad het.
“Jy moet mededingend in die vaste fasette wees en goed begin. Dis natuurlik baie makliker gesê as gedaan. Die Sharks is ’n puik span en besonder moeilik om op hul tuisveld te klop.”
Die Stormers se span wat na Durban opruk, toon egter ’n paar belangrike veranderinge van die een van die WP wat in Oktober daar verneder is.
Peter Grant is byvoorbeeld op losskakel, Andries Bekker op slot en Jaque Fourie op buitesenter. Al drie was ysters in verlede week se sege van 51-16 oor die Western Force.
Met die Sharks wat moontlik ’n lostrio van Alberts, Keegan Daniel en Ryan Kankowski sal kies, kan die stryd teen Burger, Francois Louw en Duane Vermeulen vuurwarm raak.
Alberts was een van die sterre op die Springbok-toer na Brittanje en Ierland verlede jaar en het daardie spelpeil na vanjaar se Super Rugby-reeks oorgedra.
Ofskoon Alberts ’n klipharde verdediger is – soos Burger al eerstehands gevoel het – is hy veral moeilik om te stuit wanneer die bal onder sy arm is en hy ’n bietjie spoed optel.
“Hulle het seker een van die beste lostrio’s in die kompetisie. Die Sharks het in die geheel ’n uitstekende pak voorspelers,” het Burger gesê.
“As jou pak goeie werk verrig, gee dit die losvoorspelers soveel meer van ’n kans om ’n goeie wedstryd te hê.”
Die Stormers sal natuurlik ook baie inspirasie put uit Burger se terugkeer. Hy is ’n ikoon van Suid-Afrikaanse rugby en dwing die wêreld oor gesag af met sy onverskrokke benadering tot die spel.
Hy het van ’n kniebesering herstel en vervang die beseerde Pieter Louw in die beginspan, met Nick Koster op die plaasvervangersbank.
Die slot Rynhardt Elstadt is ook weer fiks en in die beginspan ná hy die wedstryd teen die Force met ’n enkelbesering misgeloop het. De Kock Steenkamp skuif dus af na die plaasvervangersbank.
Elstadt is self ’n fisieke kalant, wat van groot waarde teen ’n span soos die Sharks kan wees.
Die Stormers-span is:
Gio Aplon, Danie Poolman, Jaque Fourie, Jean de Villiers, Bryan Habana, Peter Grant, Dewaldt Duvenage, Duane Vermeulen, Francois Louw, Schalk Burger (k), Andries Bekker, Rynhardt Elstadt, Brok Harris, Deon Fourie, Wicus Blaauw.
PLAASVERVANGERS: Ethienne Reynecke, CJ van der Linde, De Kock Steenkamp, Nick Koster, Ricky Januarie, Gary van Aswegen, Juan de Jongh.
Vir die jongste sportnuus volg Nuus24Sport op Twitter.
- Sport24