Vulkaan het sê in rugby-reëlings
2011-06-17 08:12
In-diepte Verslae
Die Western Force was te sterk teen die Lions tydens hul Vodacom Super-rugbywedstryd by die NIB-stadion in Perth.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria - Die Bulls is nog nie juis bekommerd oor die probleme wat hul Australiese eweknieë in Super Rugby ervaar weens die as-laag van die vulkaniese uitbarsting in Chili nie, maar hulle sal dalk volgende week planne moet beraam as dié probleem voortduur.
Die Reds, die Force, die Highlanders en die Crusaders moes almal Donderdag ander reëlings tref toe as uit Chili se Puyehue-Cordon Caulle-vulkaan begin het om lugverkeer in sowel Australië as Nieu-Seeland te ontwrig.
Die Crusaders moes met ’n DC3-vliegtuig wat in 1944 gebou is Wellington toe vlieg vir hul wedstryd teen die Hurricanes.
Die vliegtuig het skroef-aandrywing, vlieg laer as 10000 meter en word dus nie deur die as-laag beïnvloed nie.
Die Force en die Reds het albei vroeër gevlieg om by hul bestemmings uit te kom en volgens Sanzar se uitvoerende hoof, Greg Peters, hoef geen wedstryde uitgestel te word nie, hoewel daar grootskaalse ontwrigting in lugverkeer was.
“Hierdie was ’n groot ontwrigting, maar gelukkig kon ons al die spanne by hul bestemmings kry,” het hy in ’n verklaring gesê.
Die Bulls en (of) die Sharks sal volgende week, as wedstryde soos verwag verloop, in alle waarskynlikheid Nieu-Seeland toe moet vlieg vir die kwarteindronde.
Volgens die Bulls se spanbestuurder, Wynie Strydom, beplan hulle om eers Woensdagaand te vlieg as hulle teen die Blues in Auckland of die Crusaders in Nelson moet speel.
“Ons het basies Donderdag ’n rusdag, die kapteinsoefening Vrydag en Saterdag speel ons. Dan sal vlugflouheid nie ’n faktor wees nie,” het Strydom gesê.
Vir die jongste sportnuus volg Nuus24Sport op Twitter.
- Sport24