Tweestryde in Soweto
2010-05-28 08:03
In-diepte Verslae
Die Western Force was te sterk teen die Lions tydens hul Vodacom Super-rugbywedstryd by die NIB-stadion in Perth.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Stephen Nell
Kaapstad – Nou vir die ware Jakob!
Nadat daar twee weke gelede aanskou moes word hoe die Stormers die Bulls se B-span op Nuweland klop, vind die tweestryde waarna rugbyliefhebbers al sedert Maart uitsien oplaas Saterdag in die Orlando-stadion in Soweto plaas.
Dis die Bulls teen die Stormers – Victor Matfield teen Andries Bekker, Morné Steyn teen Peter Grant, Gary Botha teen Tiaan Liebenberg, Wynand Olivier teen Juan de Jongh en Pierre Spies teen Duane Vermeulen om net ’n handjievol van die tweestryde uit te lig.
Grant, die Stormers se komkommerkoel losskakel, meen sy en ook Steyn se heil lê by hul voorspelers.
“Ons speel agter die voorspelers en is afhanklik van die goeie besit wat hulle voorsien. Hulle het tot dusver vanjaar vir ons goeie momentum gegee en ons wil dit so hou. Jy kan dit nie as ’n man-op-man-stryd beskou nie,” sê die Stormers se onder-kaptein.
Grant is verlede week oor die hoof gesien vir die Springbok-span wat volgende Saterdag teen Wallis in Cardiff gaan speel.
Ofskoon daar nog ’n kans is dat hy in die reeks teen Italië betrokke kan wees, beskou hy nie môre se tweestryd met die Bokke se generaal as ’n kans om homself te bewys nie.
“Die span het goed gevaar en die manne wat die Bok-span gehaal het, het ’n goeie seisoen gehad. Soos ek gesê het, is al waarvoor ek hoop goeie besit. Dit gaan ’n groot stryd voor wees,” sê Grant.
Dis nie altemit nie. Voorlangs word daar veral in die lynstane na die stryd tussen Matfield en Bekker (Sport24 doen môre ’n deeglike statistiese vergelyking tussen dié twee hemelbesems) uitgesien.
Bekker was die afgelope seisoen of twee Matfield se student by die Bokke, maar sy vertonings vanjaar getuig van ’n man wat oorgehaal is om nou Suid-Afrika se nr. 5-trui sy eie te maak.
Grant het ook die rol van dissipline beklemtoon. Die Stormers is goed vertroud met wat Steyn kan doen nadat sy strafdoel die Westelike Provinsie verlede jaar in die Curriebeker-halfeindstryd op Nuweland gekelder het.
Grant se slaagsyfer pale toe van 82% vanjaar is effens beter as Steyn se syfer van 77%.
Die perspektief wat gebied moet word, is dat Steyn slegs op die Bulls se toer nie goed gekorrel het nie en oorsee met 14 van sy 26 skoppe pale toe geslaag het.
Sy slaagsyfer in Suid-Afrika is 68 uit 80 (85%).
Grant was meer bestendig en het met 49 van sy 60 skoppe pale toe geslaag.
Die Stormers se losskakel sal hom ook nie deur vuvuzelas van stryk laat bring wanneer hy môre pale toe korrel nie.
“Ek word al heel week oor die vuvuzelas geterg,” sê Grant met ’n laggie.
“Ongeag waar ons speel, sal daar baie geraas wees. Daar is baie op Nuweland en die vuvuzelas is maar net ’n ander soort klank. Hopelik kan ek dit hanteer!”
Die groot vraag is eerder of die Stormers die Bulls se lugaanval kan hanteer.
“Almal weet dit kom, maar sukkel maar om iets daaraan te doen. Ons verwag dieselfde en sal ook die aanslag van hangskoppe die hoof moet bied,” sê Grant.
Ofskoon hierdie reeds die Stormers se suksesvolste span in hul geskiedenis is, is die spelers oorgehaal om hul welslae ’n trappie verder te neem.
“Ons is altyd met die span van 1999 vergelyk, maar nou skryf ons ons eie geskiedenis. Dis wonderlik om deel daarvan te wees,” sê Grant.
“Daar is ’n groot vasbeslotenheid onder die spelers. Ja, ons het reeds iets bereik, maar ons konsentreer nou uitsluitlik op die volgende taak. En dís die een in die Noorde hierdie naweek.”
Bly op hoogte van al die jongste sportnuus deur Nuus24Sport op Twitter te volg.
- Sport24