Terblanche trek trui 200ste keer oor kop
2011-04-07 07:29
In-diepte Verslae
Die Western Force was te sterk teen die Lions tydens hul Vodacom Super-rugbywedstryd by die NIB-stadion in Perth.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg - Stefan Terblanche word Saterdag die eerste speler in die geskiedenis van Sharks- en Natal-rugby wat 200 wedstryde vir dié provinsie speel.
Sedert hy sy debuut in Suid-Afrikaanse rugby 17 jaar gelede in 1994 vir die Boland gemaak het, het hierdie oud-Swellendammer nou ’n ongelooflike 400 eersterangse wedstryde gespeel.
Dit sluit in 37 toetse vir die Springbokke, nog vier Woensdag-wedstryde vir die Bokke, drie vir die Barbarians, 87 vir die Walliese klub Ospreys, twee vir die SA onder 21-span, 67 vir die Boland, 112 Superwedstryde vir die Sharks en 87 Curriebeker-wedstryde vir die KwaZulu-Natallers.
Die 400 wedstryde wat Terblanche in Suid-Afrikaanse rugby gespeel het, is bykans 50 meer as die volgende meeste, Ollie le Roux met 357 wedstryde.
Albert van den Berg, nog ’n oud-Sharks, is derde met 338 wedstryde, gevolg deur die Bulls se Victor Matfield (337) en dan John Smit (323).
Vir die Sharks het Terblanche die langstaande rekord van Hugh Reece-Edwards en Steve Atherton (albei 165) in die stof laat byt.
Sy resep om op 35-jarige ouderdom nog steeds sy span met voorbeeld te lei, is ’n stewige dosis geluk, harde werk en om slim te wees.
“Ek is baie gelukkig met beserings,” het hy aan die Sharks se webwerf gesê.
“Jy moet ook goed omsien na jou liggaam.
“Jy moet hard oefen, genoeg rus en reg eet.
“Kortom, jy moet professioneel optree in die professionele era.
“Jy moet ook slim wees in jou oefen-metodes. Soms is jou liggaam bietjie seer en moeg en jy moet luister wat jou lyf vir jou sê.
“Rus is net so belangrik soos oefening. Jy moet die regte balans tussen die twee vind,” het Terblanche , ’n Mosselbaaier van geboorte, gesê.
Hy erken dit is ’n groot eer en ’n voorreg om op die drempel van sy 200ste verskyning vir die Sharks te staan.
“Ek is nog net so opgewonde voor ’n wedstryd as toe ek begin speel het. Al verskil is met die ervaring kom daar kalmte. Tog knaag die senuwees maar steeds soms voor wedstryde.
“My eerste wedstryd vir die Sharks in 1998 teen die Auckland Blues was ’n wonderlike ervaring. Hulle het ouens soos Carlos Spencer, Jonah Lomu, Joeli Vidiri en Adrian Cashmore gehad. ’n Ongelooflike span,” sê hy.
Hy onthou ook nog sy 100ste wedstryd teen die Westelike Provinsie en sê sy groot hoogtepunt was verlede jaar se eindstryd, toe hy die Sharks aangevoer het tot Curriebeker-glorie teen die WP in Durban.
Vir die jongste sportnuus volg Nuus24Sport op Twitter.
- Sport24