Tappe wys blaser op sy 'drie-fout'
2011-05-12 07:10
In-diepte Verslae
Die Bok-stut Tendai "Beast" Mtwarira is terug vir die Sharks se Super-stryd teen die Bulls, nadat hy lank op die kantlyn was weens 'n besering.
Die Cheetahs se afrigter, Naka Drotské, het die versoeking weerstaan om Heinrich Brüssow in die 15-tal te kies vir die stryd teen die Higlanders.
Kaapstad – Dewaldt Duvenage se “drie” wat nie vroeg in Saterdag se Super Rugbywedstryd tussen die Stormers en Crusaders toegeken is nie, moes gestaan het.
Dít was Woensdag die mening van die Sanzar-skeidsregterkeurder Tappe Henning toe hy oor die voorval vroeg in Saterdag se wedstryd op Nuweland gepols is. Henning het die kwessie sedertdien met Chris Pollock bespreek en hom op die fout gewys.
“Dit was ’n drie. Die skeidsregter het die verkeerde besluit geneem en was veronderstel om voordeel toe te laat. Die assistent-skeidsregter het aan hom gesê dat hy voordeel kan toelaat en hy het verkeerdelik ’n lynstaan aan die Crusaders toegeken,” het Henning gesê.
Duvenage het die bal onderskep nadat dit vinnig deur die Crusaders se kaptein, Kieran Read, ingegooi is. Read het egter sy een voet in die speelveld gehad toe hy die bal ingegooi het.
Die feit dat die foutiewe ingooi onderskep is, moes egter die voordeelreël in werking laat tree het.
Pollock se onsekerheid spruit egter uit die woord “disallowed” wat in die Engelse reëlboek voorkom – met ander woorde, hy het gedink die ingooi moes nie toegelaat gewees het nie omdat dit verkeerdelik deur die Crusaders uitgevoer is. Voordeel moes egter aan die Stormers toegeken word.
Die voorval het Pollock ná die wedstryd gepla en hy het Henning reeds uit sy kleedkamer by Nuweland geskakel om te vra of hy die regte besluit geneem het.
Dit het debat in plaaslike skeidsregterskringe ontketen en ’n vinnige oproep na die Internasionale Rugbyraad (IRR) het onsekerheid uit die weg geruim.
Pollock hanteer Saterdag se wedstryd tussen die Bulls en Melbourne Rebels. Die voorval is met hom bespreek sodat die fout nie herhaal word nie.
Dié gewese toetsblaser is nie van mening dat die voorval die Stormers die wedstryd gekos het nie.
“Dit het ná vier minute gebeur en dit sou onregverdig wees om te sê dit het die wedstryd se uitslag bepaal. Net so kan jy ook verwys na ’n voorval waar die Stormers se losskakel misgekorrel het,” het Henning gesê.
’n Ander besprekingspunt uit die wedstryd was dat Pollock nie strenger opgetree het toe die Crusaders laat in die wedstryd oortree het toe die Stormers rolmaalbewegings van lynstane af van stapel gestuur het nie.
“Ons het hom daaroor uitgevra en hy was nie van oordeel dat daar nie by een van die twee voorvalle waarskynlik ’n drie gedruk sou gewees het nie,” het Henning gesê.
– Sport24
Bly op hoogte van al die jongste sportnuus deur Nuus24Sport op Twitter te volg
