Super-rugby: SA het 8 blasers
2011-12-02 09:52
In-diepte Verslae
Die Western Force was te sterk teen die Lions tydens hul Vodacom Super-rugbywedstryd by die NIB-stadion in Perth.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg. – Die Oos-Kapenaar Sindile Mayende tel onder die agt Suid-Afrikaanse rugby-skeidsregters wat in die Skeidsregtersvereniging (SARRV) se groep vir die Super-seisoen in 2012 benoem is.
Die 28-jarige Mayende word as ’n kandidaat beskou om as skeidsregter in die Super-reeks op te tree, al is hy nie op Sanzar se voorlopige lys van skeidsregters in die 2012-reeks nie.
As alles volgens plan verloop, sal al agt op die SARRV se lys in die Super-reeks optree.
Die Vrystater Lourens van der Merwe en Stuart Berry van KwaZulu-Natal gaan ook ’n kans kry om Super-wedstryde te hanteer en tel onder Sanzar se reserwelys vir die reeks.
Albei is deel van die SARRV se groep vir die Super-seisoen aanstaande jaar.
Die res van die skeidsregters in die groep is reeds op Sanzar se paneel vir blasers in die Super-reeks.
Dit sluit die Vrystater Jaco Peyper in, terwyl die Wêreldbeker-skeidsregters Marius Jonker, Craig Joubert, Jonathan Kaplan en Mark Lawrence en Jaco Peyper ook deel van die Super-reeks gaan wees.
Pro Legoete tel saam met die Australiër Nathan Pearce onder die blasers wat vanjaar Super-wedstryde hanteer het, maar nie weer vir aanstaande jaar behou is nie.
Mayende het straks voor Legoete in die ry gespring, hoewel Legoete steeds ’n reserwe vir die SARRV se Super-groep is.
André Watson, Suid-Afrika se skeidsregterbaas, het gister gesê hy is tevrede met die skeidsregters waarmee Suid-Afrika tans woeker.
“As iemand soos Sindile voortgaan om soos vanjaar te presteer, is die kanse goed dat hy Super-rugby sal blaas.
“Ons het ook twee ouens, Cwengile Jadezweni (van die Westelike Provinsie) en Jaco van Heerden (van die Blou Bulle) wat nuut is in ons nasionale groep,” het hy oor die groep skeidsregters wat ’n vlak onder die Super-groep val, gesê.
Saru-panele
Die Saru-panele vir rugbyskeidsregters in 2012 is:
Super-reeks: Stuart Berry, Marius Jonker, Craig Joubert, Jonathan Kaplan, Mark Lawrence, Sindile Mayende, Jaco Peyper, Lourens van der Merwe (almal verbonde aan SARRV).
Reserwes: Quinton Immelman, Jason Jaftha, Pro Legoete, Rasta Rasivhenga, Joey Salmans (SARRV).
Nasionale groep: Ben Crouse (BB), Gerrie de Bruin (BB), Francois Groenewald (WP),
Cwengile Jadezweni (WP), Lusanda Jam (Grens), Pieter Janse van Vuuren (VS), Tiaan Jonker (GL), Mlungiseli Mdashe (Valke), Delbirth November (SWD), Archie Sehlako (KZN), Marius van der Westhuizen (WP), Jaco van Heerden (BB).
Vir die jongste sportnuus volg Nuus24Sport op Twitter.
– Sport24