Stropers teiken Loftus
2011-02-10 07:22
In-diepte Verslae
Allister Coetzee, wat uit verskeie oorde gekritiseer is oor Jebb Sinclair se insluiting, het sy soektog na 'n oorsese losvoorspeler laat vaar.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria - Die Bulls veg nie net vanaf volgende week om sy titel as die beste span in Super Rugby te behou nie, ván die veld af word ook nou groot jag gemaak op die span se senior spelers.
Die suksesse van die Bulls in Super Rugby en die senioriteit van sy kerngroep beteken dat verskeie spelers wie se kontrakte vanjaar ten einde loop, deur groot bedrae geld gelok word om hulle rugby volgende seisoen elders te speel.
Berigte dat die Lions Bakkies Botha in hulle span wil hê is geen verrassing nie en nog Bulls-spelers kan in die komende maande met groot bedrae geld suid van die Jukskei gelok word.
Botha het aangedui dat hy aan die einde van die seisoen saam met sy slotmaat, Victor Matfield, gaan uittree, terwyl inligting in Sport24 se besit daarop dui dat Danie Rossouw op pad Japan toe is.
Rossouw gaan na verwagting vir Suntory Sungoliath uitdraf, dieselfde span waaraan Fourie du Preez hom reeds verbind het.
Die afrigter van dié span, Eddie Jones, was verlede week in Suid-Afrika om kontrakte met Du Preez en Rossouw te finaliseer.
Du Preez het reeds verlede seisoen aangekondig dat hy vir drie jaar in Japan gaan speel en Rossouw se naam is toe reeds ook met Suntory verbind.
Jones se besoek was dus nie toevallig nie.
Volgens Sport24 se Franse bronne maak Toulouse ogies vir Gurthrö Steenkamp en Gary Botha. Onderhandelinge met dié twee spelers is al ver gevorderd, terwyl Wynand Olivier ook deur ’n paar klubs in Frankryk genader is.
Olivier se onderhandelinge met Bayonne in 2007 het tóé doodgeloop, maar is glo weer hervat.
Ander Bulls-spelers wie se kontrakte aan die einde van die jaar verstryk, is Deon Stegmann, Jaco Pretorius en Gerhard van den Heever.
Pretorius en Stegmann het reeds aangedui dat hulle wil aanbly, terwyl die Aussies voelers na Van den Heever uitgesteek het om sy rugbyloopbaan Doer Onder te gaan voortsit.
Die Blou Bulle Maatskappy se Hoë Prestasiebestuurder, Ian Schwartz, het by navraag gesê daar is baie aanbiedinge wat tans gemaak word.
“Die BBM het die keuse om aggressief te werf óf om aggressief sy strukture te ondersteun. Laasgenoemde het in die verlede goeie resultate vir ons opgelewer, maar ons het nog nooit geskroom om buite daardie strukture te gaan soek as daar ’n leemte ontstaan nie.”
Die BBM het ook reeds pro-aktief opgetree en in sekere posisies sy diepte aangevul.
So sal Flip van der Merwe, Juandré Kruger en Fudge Mabeta by Botha, Matfield en Rossouw kan oorneem.
Francois Hougaard sal ook Du Preez se skoene vol staan en Dean Greyling en Chiliboy Ralepelle kan Steenkamp en Botha vervang.
Stefan Watermeyer kan op sy beurt opskuif as Olivier wel meer lus is vir Jambon de Bayonne as vir biltong.
Schwartz wys daarop dat hulle nie sommer onverhoeds betrap sal word nie, vanweë die eerlikheid van hul spelers.
“Die spelers wat elders wil gaan speel, het reeds met ons daaroor kom praat, so ons is bewus van ander onderhandelinge benewens ons eie.”
Die losvoorspelers Derick Kuün en Gerrit-Jan van Velze se kontrakte verstryk ook einde vanjaar en albei spelers sal na verwagting aanbiedinge van elders kry.
Bly op hoogte van al die jongste sportnuus deur Nuus24Sport op Twitter te volg.
- Sport24