Stormers wil op regte pad begin
2011-01-28 08:18
In-diepte Verslae
Allister Coetzee, wat uit verskeie oorde gekritiseer is oor Jebb Sinclair se insluiting, het sy soektog na 'n oorsese losvoorspeler laat vaar.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - ’n Goeie rugbyseisoen vir die Stormers het verlede jaar met klinkende seges in die Neo Africa-reeks afgeskop, en vanaand se stryd teen die Lions op Nuweland bied die ideale kans vir vroeë wenmomentum.
“Jy wil elke wedstryd wen, ongeag wat op die spel is. Verlede jaar het ons momentum in hierdie reeks gebou. Dit gee jou die versekering dat jy op die regte pad is,” het die Stormers se kaptein, Schalk Burger, uitgestippel wat vanaand en in volgende Saterdag se wedstryd teen die Sharks op die spel is.
“Verlede jaar was relatief suksesvol en ons het twee eindstryde gehaal, maar daarmee saam het die hartseer van die nederlae gekom.
“Die groot fokus is om nou daardie babelas van verlede jaar af te skud en die nuwe seisoen goed te begin.”
Die wedstryd is ook ’n kleedrepetisie vir die Stormers se eerste Super Rugbywedstryd – teen die Lions op 26 Februarie.
Hoewel die Kapenaars verlede jaar teen die Western Force en Sharks verloor het nadat hulle dié spanne in die Neo Africa-reeks kafgedraf het, behoort ’n sege ’n welkome sielkundige hupstoot te bied.
Intussen het die Stormers luidens hul webtuiste ook besluit om in CJ van der Linde se afwesigheid eerder maar met Wicus Blaauw as die tiener-loskopstut Steven Kitshoff te begin. Laasgenoemde is op die plaasvervangersbank en sal wel opgestuur word.
Van der Linde, die losskakel Peter Grant en die buitesenter Jaque Fourie is die enigste groot name van die Stormers wat nie beskikbaar is nie.
Diegene wat Nuweland toe kom, kan dus onder meer sien hoe Andries Bekker vir die Stormers terugkeer, hoe Jean de Villiers en Juan de Jongh in die middelveld kombineer en hoe Bryan Habana sy eerste tree gee om sy beste spelpeil in ’n Wêreldbeker-jaar te herwin.
Dit kan moontlik ook ’n blik op die Stormers se benadering vir die nuwe seisoen bied. Verlede jaar was die Kaapse span die beste op die verdediging in die Super14-reeks en dit kan hom dalk net aanmoedig om vanjaar die krane op die aanval met groter oorgawe oop te draai.
Wat die teenstanders betref, kan ’n mens die Lions vir ’n verandering die kompliment gee dat jy hulle nie sommer op Nuweland sal afskryf nie.
’n Mens lees deesdae selfs dat na hulle as die “Manchester City” van SA rugby verwys word, maar al wat hul inkopies nog opgelewer het, is ander spanne se reserwes. Tog moet jy selfs vir West Ham United enige gegewe naweek ernstig opneem en die Lions behoort onder John Mitchell se bekwame afrigting veel beter as in 2010 se rampspoedige veldtog te vaar.
Dat hulle oorgehaal sal wees om die gety te draai, is sekerlik. Só, wen en verloor is vanaand nie die alfa en omega nie, maar in professionele sport bly dit nietemin die belangrikste maatstaf.
Die spanne is:
Stormers: Conrad Jantjes, Gio Aplon, Juan de Jongh, Jean de Villiers, Bryan Habana, Gary van Aswegen, Ricky Januarie, Duane Vermeulen, Rynhardt Elstadt, Schalk Burger (k), Andries Bekker, De Kock Steenkamp, Brok Harris, Tiaan Liebenberg, Wicus Blaauw.
PLAASVERVANGERS: Siyabonga Ntubeni, Steven Kitshoff, Frans Malherbe, Wimpie van der Walt, Quinn Roux, Pieter Louw, Siya Kolisi, Louis Schreuder, Elgar Watts, Johann Sadie, Tim Whitehead, JJ Engelbrecht, Danie Poolman.
Lions: Michael Killian, Deon van Rensburg, Waylon Murray, Jaco Taute, Lionel Mapoe, André Pretorius, Rory Kockott, Warren Whiteley, Josh Strauss, Derick Minnie, Franco van der Merwe (k), George Earle, Kevin Buys, Bandise Maku, JC Janse van Rensburg.
PLAASVERVANGERS: Martin Bezuidenhout, Jacobie Adriaanse, Wikus van Heerden, Cobus Grobbelaar, Jano Vermaak, Jannie Boshoff, Burton Francis, Edgar Marutlulle, Ross Geldenhuys, David Bulbring, Dries van Schalkwyk, Joubert Engelbrecht, Tonderai Chavhanga.
Skeidsregter: Jonathan Kaplan.
Afskop: 19:00.
Vir die jongste sportnuus volg Nuus24Sport op Twitter.
- Sport24