Stormers onseker oor seer Grant
2011-04-21 07:01
In-diepte Verslae
Die Western Force was te sterk teen die Lions tydens hul Vodacom Super-rugbywedstryd by die NIB-stadion in Perth.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad – Lionel Cronjé kan straks volgende Saterdag nog vir die Stormers die fort op losskakel hou in hul Super Rugbywedstryd teen die Sharks op Nuweland.
Robbie Fleck, agterlynslyper van die Kaapse streekspan, het Woensdag aan Sport24 gesê dat Peter Grant nog nie ten volle van sy kniebesering herstel het nie.
“Bash sukkel nog ’n bietjie en sy knie is effe geswolle. Hopelik sal hy vir ons teen die Sharks kan speel, maar ons wil hom nie te hard druk nie,” het Fleck gesê.
“As hy nie kan speel nie, sal ons gelukkig wees om vir Lionel in te span.”
Fleck meen Grant se kanse is “vyftig-vyftig” om teen die Sharks te speel. Jean de Villiers (senter) en Bryan Habana (vleuel) het wel vandeesweek geoefen en behoort beskikbaar te wees.
Die Stormers het intussen Kurt Coleman van die Westelike Provinsie se Vodacombeker-span ontbied en hy kan moontlik onder die plaasvervangers tel.
“Kurt is soortgelyk aan Gary van Aswegen. Sy aangeewerk en taktiese skopwerk is goed,” het Fleck gesê.
Cronjé is verlede Saterdag in die 13de minuut teen die Lions opgestuur toe Van Aswegen ’n knieligament geskeur het.
“Ek dink Lionel het skaflik gevaar. Dit was moeilik vir hom, gegewe dat hy nie saam met die span geoefen het nie. Hy het goeie keuses uitgeoefen en ek het gehou van die manier waarop hy soms die voordeellyn aangeval en ruimte geskep het,” het Fleck gesê.
Dit sal nietemin opnuut ’n groot toets vir die Stormers se diepte wees as hulle Cronjé en Coleman inspan.
Cronjé is die derde keuse op losskakel en Coleman effektief die vyfde keuse omdat Sam Lane vroeër in die WP se Vodacombeker-veldtog ’n ernstige kniebesering opgedoen het.
Die Sharks behoort op hul beurt die Springbok-agterspeler Patrick Lambie beskikbaar te hê.
Jacques-Louis Potgieter het in die laaste kragmeting met die Stormers vir die Sharks in Lambie se afwesigheid waargeneem.
Fleck verwag Lambie se beskikbaarheid sal vir die Sharks baie beteken.
“Hulle is ’n beter span met Lambie. Hy is ’n speler van gehalte wat beheer neem. Dit gaan nie dieselfde Sharks-span wees wat in Durban teen ons gespeel het nie. Hulle gaan wraak soek.”
Met die Stormers slegs vier punte voor die Sharks op die Suid-Afrikaanse puntelys, kan die belangrikheid van hierdie derby nie oorbeklemtoon word nie.
– Sport24
Bly op hoogte van al die jongste sportnuus deur Nuus24Sport op Twitter te volg