Stormers ‘nou wyser’
2010-05-21 09:05
In-diepte Verslae
Die Western Force was te sterk teen die Lions tydens hul Vodacom Super-rugbywedstryd by die NIB-stadion in Perth.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Stephen Nell
Kaapstad - Die Stormers wil die lesse wat in verlede jaar se verlore Curriebeker-halfeindstryd teen die Blou Bulle geleer is in Saterdag se Super14-kragmeting met die Waratahs op Nuweland toepas.
Terwyl baie ondersteuners die Fidjiaanse vleuel Sireli Naqelevuki nou nog verkwalik vir die Westelike Provinsie se nederlaag van 19-21, glo die Kapenaars hul swak begin was grootliks te blameer.
“Die groot ding is om uit daardie wedstryd te leer, want dis deel van dié span se geskiedenis. Ons het onsself in die eerste 20 minute in die voet geskiet,” het die Stormers se voorspeler-afrigter, Matthew Proudfoot, gesê.
Die Bulle was ná slegs 19 minute met 12-0 voor.
“Ons was oorgretig en onakkuraat. Ons het moeilike dinge probeer eerder as om net dieselfde ding as vantevore met beter uitvoering as vantevore te doen,” sê Proudfoot.
“Elke keer wanneer hierdie span konstruktiewe rugby speel en sy patroon afdwing, gaan dit goed.
“Dis belangrik dat ons so gou moontlik ons voete vind in die wedstryd teen die Waratahs. Ons kon dit nie onlangs teen die Sharks doen nie en die uiteinde was dat ons nie aanvallende kanse in die eerste helfte gehad het nie.”
Die ander les wat die Stormers uit die onlangse verlede neem, is wat hulle teen Australiese spanne geleer het.
“Ons het geleer dat die Aussies goeie stelsels in plek het om jou fisieke benadering teen te werk.
“Ons moet vertroud raak met daardie stelsels en kan nie toelaat dat ons daardeur geklop word nie,” het Proudfoot gesê.
Die Stormers het vanjaar teen die Brumbies, Reds én Western Force verloor.
Bly op hoogte van al die jongste sportnuus deur Nuus24Sport op Twitter te volg.
- Sport24