Stormers kies straks jeug bo ervaring
2011-02-16 07:46
In-diepte Verslae
Die Western Force het die Lions tydens hul Super-rugbywedstryd by die NIB-stadion in Perth geklop.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Die 19-jarige stutte Steven Kitshoff en Frans Malherbe sal straks ten koste van meer ervare spelers deel van die Stormers se planne vir hul eerste Super Rugby-wedstryd – teen die Lions op 26 Februarie – wees.
Wicus Blaauw, JC Kritzinger en JD Moller was Dinsdag almal in die Westelike Provinsie se Vodacombeker-groep wat ’n afrigtingskliniek in die Bo-Kaap gehou het.
Kritzinger het pas van ’n kniebesering herstel en die verwagting is dat hy as veelsydige stut-opsie deur die Stormers nader getrek sal word sodra hy weer wedstrydfiks is.
Intussen sal dit as geen verrassing kom indien die Stormers Kitshoff of Malherbe as plaasvervanger teen die Lions op Nuweland inspan nie.
Kitshoff sal in daardie geval seker as loskopstut die gunsteling wees, want die verwagting is dat die Stormers met Brok Harris as vaskop en CJ van der Linde as loskop sal begin.
Laasgenoemde het ervaring van vaskop op toetsvlak en kan maklik oorskuif indien dit nodig raak.
Die Stormers se voorspeler-afrigter, Matt Proudfoot, het egter Dinsdag gesê dat daar nog nie ’n finale besluit oor die stutte vir die wedstryd teen die Lions geneem is nie. Blaauw se teenwoordigheid in die WP se groep beteken dus nie dat hy in onguns by die Stormers verval het nie.
“Wicus is ’n goeie speler en JC maak sy terugkeer van ’n besering. Daar is realisties ses stutte wat vir die Stormers kan speel,” het Proudfoot gesê.
Hy verwys waarskynlik na Van der Linde, Harris, Kritzinger, Blaauw, Kitshoff en Malherbe.
Die WP se veldtog in die Vodacombeker begin ook op 26 Februarie – in ’n voorwedstryd op Nuweland teen die Leeus. Dit sal dus interessant wees om te sien hoe die stutte om die beurt by die Stormers en Streeptruie aangewend word. Daar sal vanjaar ook noue samewerking tussen die Stormers en WP se afrigters wees.
“Dis nog vroeg en ons het nog nie ’n finale besluit oor spankeuses geneem nie. Daar kan nog ’n paar verwikkelinge wees. Ons sal ook die Lions se wedstryd teen die Bulls – Saterdag – ontleed voor ons ’n span kies,” het Proudfoot gesê.
Terwyl die etlike stut-opsies verblydend is, is die situasie op haker ná Tiaan Liebenberg se kniebesering ’n bietjie benard. Deon Fourie is nou die eerste keuse, maar die vraag is of die Stormers met Siyabonga Ntubeni as sy adjudant kan waag.
“Ons het dit vandag lank bespreek en voel Callie Visagie (Maties se kaptein) is in die provinsie. Ons kyk ook na wat buite die WP beskikbaar is,” het Proudfoot gesê.
Visagie het egter akademiese verpligtinge en het daarom nie vir vanjaar ’n kontrak met die WP gesluit nie.
Bly op hoogte van al die jongste sportnuus deur Nuus24Sport op Twitter te volg.
- Sport24