Stormers hou asem op
2011-06-06 07:03
In-diepte Verslae
Die Western Force het die Lions tydens hul Super-rugbywedstryd by die NIB-stadion in Perth geklop.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad – Die fiksheid van Peter Grant, Dewaldt Duvenage en CJ van der Linde sal hoog op die Stormers-afrigter, Allister Coetzee, se sakelys wees wanneer hy Maandag weer by die Westelike Provinsie Rugbyunie se Sentrum vir Uitnemendheid in Bellville inry.
Hoewel die Stormers puik sonder dié drie vertoon het in Vrydag se wegholsege van 40-3 oor die Melbourne Rebels, kan hulle vir die Stormers waardevolle ervaring in sleutelposisies bied vir Saterdag se Super Rugbywedstryd teen die Bulls op Nuweland.
“Hulle reageer goed op behandeling, maar ons sal die spelers Maandag (vandag) evalueer en dan weet hoe sake staan,” het Coetzee oor die naweek gesê voordat die Stormers hul reistog terug Kaap toe aangepak het.
Van der Linde het in die 37ste minuut van die Stormers se wedstryd teen die Blues opnuut ’n heupbesering opgedoen.
Die stut is huis toe gestuur met die hoop dat hy betyds vir die derbywedstryde teen die Bulls en Cheetahs sal herstel.
Wicus Blaauw en Brok Harris was die stutte in die beginspan vir die kragmetings met die Brumbies en Rebels, met Steven Kitshoff en Frans Malherbe wat om die beurt as plaasvervangers ingespan is.
Dit kan egter van groot waarde wees om ’n ervare plaasvervangersbank teen die Bulls te hê, want die kampioenspan se reserwekrag is self ’n groot deel van sy aanslag.
Duvenage het ’n enkel- en toonbesering teen die Brumbies opgedoen, terwyl Grant sy enkel reeds in die eerste toerwedstryd – teen die Chiefs – beseer het.
Kurt Coleman het hom Vrydag baie goed van sy taak as losskakel gekwyt, maar die Stormers sal gemakliker voel teen die Bulls indien Grant op sy pos is.
Nuweland gaan stampvol en ’n drukkoker wees, en die koelkop van ’n tydbeproefde en ervare generaal is presies wat die tuisspan benodig.
Die vaardighede wat Coleman ten toon gestel het, dui ook daarop dat hy baie belofte as troefspeler sal inhou.
Dit kan seker as ’n gegewe aanvaar word dat Andries Bekker na die Stormers se beginspan sal terugkeer.
Dit behoort vandeesweek dus weer opnuut te gons oor sy tweestryd met die Bulls se kaptein en Suid-Afrika se onbetwiste lynstaankoning, Victor Matfield.
Soos gewoonlik is daar geen beter maatstaf as ’n wedstryd teen die Bulls nie.
– Sport24
Bly op hoogte van al die jongste sportnuus deur Nuus24Sport op Twitter te volg