Stormers gaan nie vanjaar terughou nie
2011-02-26 07:25
In-diepte Verslae
Die Western Force het die Lions tydens hul Super-rugbywedstryd by die NIB-stadion in Perth geklop.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - As die Springbok-afrigter, Peter de Villiers, bekommerd is oor wat Suid-Afrika se rugbyspanne mekaar in vanjaar se Super Rugbyreeks gaan aandoen, is dit met goeie rede.
Die Stormers skop vanaand hul seisoen met ’n wedstryd teen die Lions af en die Kapenaars se kaptein, Schalk Burger, het belowe dat niemand hul lywe gaan spaar nie met die oog daarop om fiks te bly vir die Wêreldbeker-toernooi later vanjaar in Nieu-Seeland.
“Daar sal nie teruggehou word nie,” het Burger belowe.
“Dis vir ons ’n tuiswedstryd en die Lions sal terselfdertyd oorgehaal wees om op die wenpad te kom nadat hulle verlede week verloor het. Hulle sal dié wedstryd seker beskou as ’n keerpunt,” het Burger gesê.
Verhoogde fisieke intensiteit kan vanjaar ’n natuurlike gevolg wees van al die derbywedstryde in die toernooi. Daar sal ’n gepaardgaande risiko ten opsigte van beserings wees, maar dit sal nie spelers se motivering om in te klim negatief raak nie.
“Ons fokus tans net op Super Rugby en as jy aan die wenkant is, is dit makliker om spelers te laat rus. Jy gaan altyd beserings in ’n Wêreldbekerjaar kry en daar gaan tragiese verhale wees. Jy kan net duim vashou dat dit nie enige van jou goeie maats is nie,” het Burger voorts gesê.
Die Lions het met verlede week se terugvegpoging in die tweede helfte teen die Bulls op Coca-Colapark gewys hulle is op pad om weer ’n krag in Suid-Afrikaanse rugby te word onder die afrigterskap van John Mitchell.
Hulle het met 20-24 verloor, maar die kampioenspan was uiters verlig om die eindfluitjie te hoor. “Daardie tweede helfte het gewys dit maak nie saak hoe goed die spelers in jou span is as jy nie balbesit kry en dit beskerm nie,” het Burger bygevoeg.
“Die Lions was indrukwekkend en hulle het ons in die opwarmingswedstryd hier op Nuweland ook onder druk geplaas deur die bal vir verskeie fases te behou.” Die Stormers het daardie kragmeting in die Neo Africa-reeks met 15-0 gewen, maar albei spanne het toe maar nog litte losgemaak. Om te veel daarin te lees, sal dus ’n fout wees.
Die Stormers het verlede week ’n loslootjie gehad en is nou gretig om hul seisoen in alle erns te begin. “Die beplanning het goed verloop. Jy is altyd aan die begin ’n bietjie senuagtig, maar ek glo die spelers sal hulle goed van hul taak kwyt as ons eers aan die gang kom. Ek is baie tevrede met ons voorbereiding,” het die Kapenaars se afrigter, Allister Coetzee, gesê.
- Sport24
Bly op hoogte van al die jongste sportnuus deur Nuus24Sport op Twitter te volg
- Die Burger