Stormers-breier se kopkrapper
2010-03-10 09:16
In-diepte Verslae
Die beseerde losvoorspelers CJ Stander en Dewald Potgieter kan straks gekies word vir die Bulls se Super-stryd teen die Chiefs in Hamilton.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Stephen Nell
Kaapstad - Gaan die Stormers se afrigter, Allister Coetzee, die betwisbare besluit neem om die Fidjiaanse vleuel Sireli Naqelevuki in sy beginspan te behou vir Saterdag se Super14-rugbywedstryd teen die Hurricanes op Nuweland?
Gio Aplon het vandeesweek van griep herstel en is weer beskikbaar om uit die staanspoor as regtervleuel diens te doen, maar Naqelevuki het so goed in die sege van 33-0 oor die Highlanders gespeel dat hy Coetzee met ’n kopkrapper gelaat het.
“Sireli was werklik goed en sy werkverrigting ongelooflik. Hy het oral op die veld opgeduik,” sê Coetzee.
“Wanneer hy die bal gedra het, het hy ook voluit gehardloop.
“Hy het in die proses soms twee, drie of selfs vier verdedigers besig gehou.”
Coetzee sal straks ook sy span met Saterdag se teenstanders in gedagte kies, en die Hurricanes het baie fisieke agterspelers.
Aplon het wel die naweek as plaasvervanger in gebroke spel uitgeblink nadat hy vir Joe Pietersen op heelagter vervang het.
Op 74 kg is hy egter 40 kg ligter as Naqelevuki.
Met die Hurricanes in gedagte, kan Coetzee besluit dat Aplon die beste opsie van die plaasvervangersbank sal wees.
Die beste manier om die Hurricanes te klop, is dalk om ’n drukkoker voor te berei waarin min ruimte vir hul agterspelers gegun word.
“Ons moet seker maak dat ons fisiek ons man staan en balbesit goed behou, want hulle is baie gevaarlik vanuit gebroke spel,” sê Coetzee.
“Die Cheetahs het hulle goed van balbesit ontneem.
“Die Hurricanes verkies gebroke spel en wat jy moet doen, is om by jou struktuur te bly en besit te hou.
“Dit sal die week uiters belangrik wees om die bal te behou.”
Een van die groot positiewes teen die Highlanders was ook die Stormers se lynstaanspel.
As hulle dit teen die Hurricanes kan herhaal, kan dit ’n belangrike wapen wees om die ritme van ’n span met gevaarlike hardlopers soos Ma’a Nonu, Conrad Smith, Cory Jane en David Smith te versteur.
As die Stormers dié stryd in die loopgrawe wil beslis, kan Naqelevuki se fisieke teenwoordigheid ’n wyse opsie wees.
Sy statistieke teen die Highlanders vertel ’n interessante verhaal.
Hy het 10 keer met die bal gehardloop – saam met Bryan Habana die meeste in die span – en 99 m veld gewen. Hy het ook 5 duikslae afgeskud en 6 keer oor die voordeellyn gekom.
Wat sy verdediging betref, het hy soos Jaque Fourie 8 doodvatte uitgevoer en met 2 misluk.
Naqelevuki het ook op eie houtjie ’n kwart van die Stormers se omkeerbesit bewerkstellig.
Hy het besit 3 keer omgekeer – 2 keer by die afbreekpunte en 1 keer deur ’n teenstander by die kantlyn uit te duik. In totaal het die Stormers 12 keer omkeerbesit gewen.
Aplon het ook baie deugde, veral as daar ruimte is om aan te val en met sy linkervoet.
- Die Burger