Stormers-breier: Groentjie g’n risiko
2010-03-18 08:53
In-diepte Verslae
Die Western Force het die Lions tydens hul Super-rugbywedstryd by die NIB-stadion in Perth geklop.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Stephen Nell
Kaapstad - Die Ikey-senter Tim Whitehead is Woensdag as Juan de Jongh se plaasvervanger in die Stormers se beginspan bevestig, terwyl Gio Aplon ’n verrassende terugkeer op die regtervleuel in Saterdag se Super14-rugbywedstryd teen die Cheetahs op Nuweland maak.
Dit was ’n keuse om Willem de Waal op losskakel te kies en Peter Grant in die plek van die beseerde De Jongh binnesenter toe te skuif, maar die Stormers vertrou die 21-jarige Whitehead sal sy Super14-toets met lof slaag.
“Dis tyd vir ons om vertroue in ons jong spelers te toon. Wanneer ander unies dit doen, word dit as positief gesien, maar wanneer ons dit doen, word daar skielik oor risiko’s gepraat,” het die Stormers se afrigter, Allister Coetzee gesê.
“Tim het vier wedstryde in die Varsitybeker en drie vir die Westelike Provinsie as binnesenter in die Vodacombeker-reeks gespeel. Hy het ook in ons opwarmwedstryde teen die Boland en Maties gespeel.
“Hy het ons beïndruk. Hy het die vermoë om onder druk goeie besluite te neem en goeie visie. Ons is dun op binnesenter, maar Juan sal gelukkig gou weer reg wees.”
Coetzee glo nie Whitehead sal die Stormers se hoë standaarde op die verdediging verlaag nie.
“Ek’s heel gemaklik met hom in daardie opsig. Hy het ’n groot hart.
”Die besluit om Aplon weer in die beginspan in te sluit ná Sireli Naqelevuki se goeie vertoning teen die Hurricanes, sal baie mense verbaas. Daar is egter ook verskeie goeie redes vir die skuif.
“Gio was drie weke gelede nog ons beste nr.14. Hy het griep gehad en dis net reg dat hy weer gekies word. Ek is bly Sireli het en sy selfvertroue ’n hupstoot gegee. Gio het ’n gerekende linkervoet en dis ’n goeie wapen,” sê Coetzee.
Met Aplon se insluiting kry die Stormers ook ’n inspuiting van vaart.
Dit kan hulle straks help wanneer daar teen blitse soos Jongi Nokwe en Lionel Mapoe verdedig word.
Die Stormers-span is: Joe Pietersen, Gio Aplon, Jaque Fourie, Tim Whitehead, Bryan Habana, Peter Grant, Dewaldt Duvenage, Duane Vermeulen, Francois Louw, Schalk Burger (k), Andries Bekker, Anton van Zyl, Brock Harris, Tiaan Liebenberg, Wicus Blaauw.
PLAASVERVANGERS: Deon Fourie, JC Kritzinger, De Kock Steenkamp, Pieter Louw, Ricky Januarie, Willem de Waal, Sireli Naqelevuki.
- Sport24